مراد سعید احتجاج میں آگئے تو عمران خان اور فیض حمید کو کوئی نہیں بچا سکے گا، فیصل واوڈا

اسلام آباد (قدرت روزنامہ)سینیئر سیاستدان فیصل واوڈا نے کہا ہے کہ تحریک انصاف کا احتجاج ہمیشہ کی طرح فلاپ ہوجائے گا، اگر مراد سعید احتجاج میں آگئے تو پھر عمران خان اور فیض حمید کو کوئی شخص بچا نہیں سکے گا۔
نجی ٹی وی سے گفتگو کرتے ہوئے انہوں نے کہاکہ مجھے اگر کوئی حکومت کا اتحادی کہے تو یہ مجھے طنز لگتا ہے، کیونکہ مجھ پر ابھی اتنا بھی برا وقت نہیں آیا۔
انہوں نے کہاکہ اگر کسی کا یہ خیال ہے کہ عمران خان نومبر میں رہا ہوجائیں گے تو یہ اس کی غلط فہمی ہے، 24 نومبر کے احتجاج میں ریاست سانحہ 9 مئی کے مسنگ لوگوں کو ڈھونڈے گی۔
فیصل واوڈا نے کہاکہ یہ دھرنا بھی ہمیشہ کی طرح لوگوں کو مروانے کے لیے کیا جارہا ہے، عمران خان کے ارد گرد لوگ وہی کررہے ہیں جو میں کہہ رہا تھا۔
انہوں نے کہاکہ عمران خان کے حوالے سے امریکا اور برطانیہ سے بھی خطوط آگئے مگر کچھ نہیں ہوا، اس وقت پی ٹی آئی کے اندر 6 سے 8 دھڑے ہیں۔
سینیئر سیاستدان نے کہاکہ ایک ایم پی اے کو 5 ہزار لوگ لانے کا کہا جارہا ہے، لیکن اگر وہ 50 لوگ بھی لے آیا تو میں سلام پیش کروں گا۔
پروگرام میں موجود پی ٹی آئی کے سینیئر رہنما لطیف کھوسہ نے فیصل واوڈا کو چیلنج کرتے ہوئے کہاکہ عمران خان نومبر میں رہا ہوجائیں گے، بلکہ 24 نومبر سے قبل ہی ڈراپ سین ہوسکتا ہے۔
انہوں نے کہاکہ 24 نومبر کو حکمران خش و خاشاک کی طرح بہہ جائیں گے، کیونکہ ان کو اندازہ ہی نہیں کہ اس روز کتنے لوگ احتجاج کے لیے نکلیں گے۔