بانی پی ٹی آئی کیخلاف درج تمام مقدمات میں عبوری ضمانت کی استدعا مسترد

لاہور(قدرت روزنامہ)لاہور ہائیکورٹ نے بانی پاکستان تحریک انصاف ( پی ٹی آئی ) کے خلاف درج تمام مقدمات میں عبوری ضمانت دینے کی استدعا مسترد کردی۔
لاہور ہائیکورٹ کے جسٹس فاروق حیدر نے بانی پی ٹی آئی کی ہمشیرہ نورین نیازی کی درخواست پر سماعت کی جو عمران خان کے خلاف درج مقدمات کی تفصیلات کے لیے دائر کی گئی تھی جبکہ درخواست میں تمام مقدمات میں عبوری ضمانت دینے کی استدعا بھی کی گئی تھی۔
محکمہ داخلہ پنجاب اور وفاقی حکومت کی جانب سے بانی پی ٹی آئی پر درج مقدمات کی رپورٹس عدالت میں پیش کی گئیں۔
محکمہ داخلہ پنجاب کی جانب سے بانی پی ٹی آئی کیخلاف کوئی بھی مقدمہ درج نہیں کیا گیا جبکہ وفاقی حکومت کے وکیل نے بتایا کہ انکے خلاف اسلام آباد پولیس نے 62 کیسز درج کر رکھے ہیں اور وکیل پنجاب حکومت نے بتایا کہ صوبے کی حدود میں 54 مقدمات درج ہیں۔
مقدمات کی تفصیل سامنے آنے پر وکیل درخواستگزار نے استدعا کی کہ بانی پی ٹی آئی کو تمام مقدمات میں عبوری ضمانت فراہم کی جائے تاہم عدالت نے استدعا مسترد کر دی۔
جسٹس فاروق حیدر کا کہنا تھا کہ میرا نقطہ نظر یہ نہیں ہے، میرے نزدیک ملزم کا ضمانت قبل از گرفتاری میں عدالت کے روبرو پیش ہونا ضروری ہے۔
بعدازاں، عدالت نے تمام رپورٹس کی روشنی میں درخواست نمٹا دی۔