’مودی بریانی کھانے لاہور جا سکتے ہیں تو کرکٹ ٹیم کیوں نہیں جاسکتی‘؟
اسلام آباد (قدرت روزنامہ)ریاست بہار کے سابق وزیراعلیٰ لالو پرساد یادیو کے بیٹے اور سیاستدان تیجا شوی یادیو نے کہا ہے کہ چیمپیئنز ٹرافی کے لیے بھارتی ٹیم کو پاکستان بھیجنا چاہیئے۔ مودی بریانی کھانے لاہور جا سکتے ہیں تو کرکٹ ٹیم بھیجنےمیں کیا حرج ہے؟
بھارتی میڈیا رپورٹس کے مطابق ریاست بہار کے سابق وزیر اعلیٰ لالو پرساد یادیو کے بیٹے اور سیاستدان تیجا شوی یادیو نے بھارتی ٹیم کو پاکستان بھیجنے کامطالبہ کرتے ہوئے کہا کہ کھیلوں میں سیاست کو شامل کرنا مناسب عمل نہیں۔
تیجاشوی یادیو کا کہنا ہے کہ کیا اولمپکس میں ہر کوئی ایک دوسرے سے مقابلہ نہیں کرتا؟ بھارتی ٹیم چیمپیئنز ٹرافی کے لیے پاکستان کیوں نہیں جا سکتی۔ تیجاشوی یادیو نے سوال اٹھایا کہ ’جب نریندر مودی بریانی کھانے لاہور جا سکتے تو کرکٹ ٹیم کے جانے میں کیا حرج ہے؟‘۔
یاد رہے کہ چیمپئنز ٹرافی کی میزبانی پاکستان کے پاس ہے اور آئی سی سی ٹورنامنٹ کے لیے 100 روز قبل شیڈول کا اعلان کرنا ضروری ہوتا ہے تاہم بھارت کی ہٹ دھرمی کی وجہ سے ٹورنامنٹ میں 90 روز باقی رہنے کے باوجود تاحال چیمپیئنز ٹرافی کا شیڈول جاری نہیں کیا۔
