قوم کی حمایت کے ساتھ مسلح افواج تمام خطرات سے نمٹنے کے لیے تیار ہے، آرمی چیف جنرل سید عاصم منیر

نارووال (قدرت روزنامہ)چیف آف آرمی اسٹاف جنرل سید عاصم منیر نے کہا کہ مسلح افواج، قوم کی پرعزم حمایت کے ساتھ تمام خطرات سے نمٹنے کی بھرپور صلاحیت رکھتی ہیں۔

آرمی چیف جنرل سید عاصم منیر نے دورہ نارووال اور سیالکوٹ میں پاک فوج کی فیلڈ ٹریننگ مشقوں کا تفصیلی معائنہ کیا۔ ٹریننگ فیلڈ پہنچنے پر کور کمانڈر گوجرانوالہ اور انسپکٹر جنرل ٹریننگ نے آرمی چیف کا استقبال کیا۔ دورے کے دوران سپہ سالار کو مشق کے مقاصد اور انعقاد کے بارے میں جامع بریفنگ بھی دی گئی۔

آئی ایس پی آر کے مطابق چیف آف آرمی اسٹاف جنرل سید عاصم منیر نے فوجیوں کے ساتھ میدان میں دن گزارا، جوانوں کے تربیتی معیار، آپریشنل تیاری اور بلند حوصلے کی تعریف کرتے ہوئے کہا کہ قومی حمایت سے مادر وطن کی علاقائی سالمیت اور خود مختاری کی حفاظت کرنے کی صلاحیت رکھتے ہیں۔

سپہ سالار نے دشمن کی طرف سے کسی بھی ممکنہ خطرات کا مقابلہ کرنے کے لیے مستقل تیاری برقرار رکھنے کی اہمیت پر زور دیا۔

آئی ایس پی آر نے بتایا کہ مشق کے دوران آرمر، انفنٹری، میکانائزڈ انفنٹری، آرٹلری، ایئر ڈیفنس، آرمی ایوی ایشن اور اینٹی ٹینک گائیڈڈ میزائل یونٹس نے مربوط فائر اور مینیوور آپریشنز کیے۔ برقی جنگی صلاحیتوں اور معلوماتی آپریشنز کے مؤثر استعمال کا بھی مظاہرہ کیا گیا۔ ان آپریشنز کو دشمن کے مواصلات میں خلل ڈالنے اور جدید میدان جنگ کے ماحول میں غلط معلومات کی حکمت عملیوں کا مقابلہ کرنے کے لیے ڈیزائن کیا گیا۔

آئی ایس پی آر کا مزید کہنا تھا کہ مشقوں کا مقصد ابھرتے آپریشنل چینلجز سے نمٹنے کے لیے پیشہ وارانہ مہارتوں اور میدان جنگ کے طریقہ کار کو بہتر بنانا تھا۔