2024 میں پاکستانی کیا کچھ سرچ کرتے رہے؟ گوگل نے دلچسپ حقائق شئیر کردیے

کرکٹ: کھیل کا جنون

کرکٹ کے میدان میں پاکستانی شائقین کا جوش و خروش ہمیشہ کی طرح نمایاں رہا۔ ٹی20 ورلڈ کپ نے سب سے زیادہ توجہ حاصل کی، جب کہ پاکستان کے انگلینڈ، بھارت، بنگلہ دیش، اور آسٹریلیا کے ساتھ ہونے والے میچز بار بار سرچ کیے گئے۔ پی ایس ایل 2024 کا شیڈول بھی شائقین کے لیے خاص دلچسپی کا باعث بنا۔ اس کے علاوہ بھارت اور انگلینڈ کے میچز کے ساتھ جنوبی افریقہ اور یو ایس اے کے خلاف میچز کو بھی لوگ بار بار تلاش کرتے رہے۔

سب سے زیادہ سرچ کی جانے والی شخصیات
2024 میں پاکستانیوں نے گوگل پر مختلف شعبوں سے تعلق رکھنے والی شخصیات کو تلاش کیا۔ ارشد ندیم، جو پیرس اولمپکس میں جیولن تھرو کے فاتح رہے، سب سے زیادہ سرچ کی جانے والی شخصیات میں شامل رہے۔ اداکارہ ثنا جاوید، شعیب ملک، اور ٹک ٹاک اسٹار مناہل ملک بھی عوام کی توجہ کا مرکز رہے۔ حیرت کی بات یہ ہے کہ بھارتی بزنس مین مکیش امبانی اور سوشل میڈیا اسٹار حریم شاہ بھی اس فہرست میں جگہ بنانے میں کامیاب ہوئے۔ دیگر نمایاں ناموں میں ساجد خان، زویا ناصر، اور عباس عطار شامل ہیں، جو مختلف شعبوں میں اپنی کارکردگی کے باعث مقبول رہے۔

فلموں اور ڈراموں کی دنیا
2024 میں پاکستانیوں کی فلموں اور ڈراموں سے محبت کا مظاہرہ گوگل سرچز میں بھی ہوا۔ اے آر وائی کا ڈرامہ ’کبھی میں کبھی تم‘ سب سے زیادہ سرچ کیے جانے والے ڈراموں میں شامل تھا۔ بالی ووڈ فلموں میں ’ہیرا منڈی‘، ’انیمل‘، ’ڈنکی‘، اور ’بھول بھلیاں 3‘ پاکستانیوں کی توجہ کا مرکز رہیں۔ نیٹ فلکس کے مشہور شو ’مرزاپور‘ اور بھارتی ریئلٹی شو ’بگ باس 17‘ بھی ٹاپ سرچز کا حصہ بنے۔ دیگر ڈراموں اور فلموں میں ’عشق مرشد‘، ’بارہویں فیل‘، اور ’اسٹریٹ 2‘ نے بھی اپنی جگہ بنائی۔

“کیسے کریں؟” کے سوالات
پاکستانیوں نے 2024 میں گوگل سے مختلف مسائل کے حل تلاش کیے۔ جیسے پولنگ اسٹیشن تلاش کرنے کا طریقہ، دادی کے مرنے سے پہلے لاکھوں کمانے کے مشورے، استعمال شدہ گاڑی خریدنے کا طریقہ، اور کمپیوٹر میں یوٹیوب ویڈیوز ڈاؤن لوڈ کرنے کا حل۔ مزید برآں، پھولوں کو تازہ رکھنے، جینز سے گھاس کے داغ نکالنے، اور بچے کو اشتراک سکھانے جیسے گھریلو مسائل بھی سرچ کیے گئے۔ کھیلوں کے شائقین نے ورلڈ کپ لائیو دیکھنے کے طریقے تلاش کیے، جب کہ ورزش کے شوقین افراد نے گھٹنے کی چوٹ کے بعد دوبارہ ورزش شروع کرنے کے مشورے ڈھونڈے۔

کھانے کی نئی ترکیبیں
2024 میں پاکستانیوں نے کھانے کی منفرد ترکیبوں میں دلچسپی ظاہر کی۔ کیلے سے روٹی اور لہسن سے بنی روٹی جیسی تراکیب مقبول رہیں۔ مالپورہ، پیچ آئس ٹی، کریم پاستا، اور چاکلیٹ چپ کوکیز جیسی ریسیپیز نے بھی توجہ حاصل کی۔ پیزا، انڈون نوڈلز، اور ہیش براؤن کی تراکیب نے مزیدار پکوان کے شوقین افراد کو خوش کیا۔

ٹیکنالوجی کا بڑھتا رجحان
ٹیکنالوجی میں دلچسپی رکھنے والے پاکستانیوں نے جدید ترین آلات اور ایپلیکیشنز پر اپنی توجہ مرکوز رکھی۔ چیٹ جی پی ٹی لاگ ان، بنگ امیج کری ایٹر، اور جیمی نائی جیسی جدید AI ٹیکنالوجیز مقبول رہیں۔ موبائل فونز میں انفنکس نوٹ 30، ویوو وائے 100، آئی فون 16 پرو میکس، اور انفنکس ہاٹ 50 پرو جیسی ڈیوائسز نے لوگوں کی توجہ کھینچی۔

یہ تمام سرچز پاکستان کے عوام کے بدلتے رجحانات، عالمی واقعات سے جڑنے کی خواہش، اور زندگی کے ہر پہلو میں دلچسپی کو ظاہر کرتی ہیں۔