جعلی خبریں پھیلانے پر 80 ہزار موبائل فون سمز بلاک

اسلام آباد (قدرت روزنامہ)وفاقی حکومت نے جعلی خبریں پھیلانے پر 80 ہزار موبائل فون کی سمز بلاک کر دیں۔
سوشل میڈیا پلیٹ فارمز پر جعلی خبروں کے حوالے سے قومی اسمبلی میں توجہ دلاؤ نوٹس کا جواب دیتے ہوئے کابینہ ڈویژن کے پارلیمانی سیکریٹری ساجد مہدی نے بتایا کہ حکومت نے اس چیلنج سے نمٹنے کے لیے مختلف اقدامات شروع کیے ہیں۔
انہوں نے اس سلسلے میں مشترکہ ٹاسک فورس کے قیام پر روشنی ڈالتے ہوئے کہا کہ ٹاسک فورس نے اپنی رپورٹ وزیر اعظم شہباز شریف کو پیش کر دی ہے۔
ساجد مہدی نے الیکٹرانک جرائم کی روک تھام کے قانون پیکا میں ترامیم کی ضرورت پر بھی زور دیا تاکہ اس مسئلے سے بہتر طریقے سے نمٹا جا سکے۔
ان کا کہنا تھا کہ جعلی خبروں کے پھیلاؤ سے متعلق مقدمات کی سماعت کو تیز کرنے کے لیے ترامیم کی ضرورت ہے۔
انہوں نے جعلی خبروں کے چیلنج سے نمٹنے اور آن لائن سرگرمیوں کی بہتر نگرانی کے لیے اقدامات کے حصے کے طور پر ورچوئل پرائیویٹ نیٹ ورکس(وی پی اینز) کو رجسٹر کرنے کے اقدام پر بھی روشنی ڈالی۔
سیکریٹری نے کہا کہ ان اقدامات سے جعلی خبروں کے پھیلاؤ کو روکنے میں بہتری آئے گی۔ انہوں نے نشاندہی کی کہ شہریوں کو جعلی خبریں پھیلانے کے خطرات اور نتائج سے آگاہ کرنے کے لیے ایک آگاہی مہم بھی شروع کی گئی ہے۔