بلوچستان میں دہشت گردی کے واقعات میں 582 افراد جاں بحق

کوئٹہ(قدرت روزنامہ)وفاقی وزارتِ داخلہ کی جانب سے پیش کی گئی تازہ ترین رپورٹ کے مطابق، بلوچستان میں حالیہ عرصے کے دوران دہشت گردی کے 582 واقعات رونما ہوئے ہیں جس میں مجموعی طور پر 307 افراد اپنی جان سے ہاتھ دھو بیٹھے ہیںرپورٹ کے مطابق، ان واقعات میں 110 سیکیورٹی اہلکار اور 197 شہری ہلاک ہوئے۔ اس کے علاوہ، دہشت گردی کے دیگر واقعات میں کئی افراد زخمی بھی ہوئے جنہیں اسپتالوں میں طبی امداد فراہم کی گئی ہے وفاقی وزیرِ داخلہ محسن نقوی نے کہا کہ یہ اعداد و شمار بلوچستان میں سیکیورٹی کی صورتِ حال کی سنگینی کو ظاہر کرتے ہیں اور حکومت کی جانب سے اس چیلنج کا مقابلہ کرنے کے لیے فوری اقدامات کی ضرورت پر زور دیا۔ انہوں نے مزید کہا کہ سیکیورٹی فورسز دہشت گردی کے خلاف کارروائیوں میں مصروف ہیں اور حکومت بلوچستان میں امن و امان کی بحالی کے لیے بھرپور کوششیں کر رہی ہے۔رپورٹ میں یہ بھی بتایا گیا کہ بلوچستان میں دہشت گردی کے واقعات میں اضافہ مقامی انتہا پسند گروپوں اور غیر ملکی قوتوں کی حمایت یافتہ دہشت گرد تنظیموں کی سرگرمیوں سے جڑا ہوا ہے۔ حکام نے اس صورتحال پر قابو پانے کے لیے داخلی اور خارجی سطح پر تعاون بڑھانے کی ضرورت پر زور دیا۔پاکستانی عوام اور سیکیورٹی اداروں نے دہشت گردی کے خلاف جاری جنگ میں اپنی قربانیاں دیں، اور یہ رپورٹ ان قربانیوں کو اجاگر کرنے کے لیے پیش کی گئی۔