سلمان خان کی فلم ’سکندر‘ کا ٹیزر لانچ کیوں ملتوی ہوا؟

ممبئي(قدرت روزنامہ)بالی وڈ کے سپر اسٹار سلمان خان کی اگلی ایکشن فلم ’سکندر‘ کا ٹیزر لانچ ملتوی کردیا گیا ہے۔ جمعہ کو سلمان خان کی 59ویں سالگرہ کے موقع پر ان کی نئی ایکشن فلم ‘سکندر’ کا ٹیزر ریلیز کیا جانا تھا۔ تاہم جمعہ کی صبح یہ اعلان کیا گیا کہ سابق بھارتی وزیراعظم من موہن سنگھ کے انتقال کی وجہ سے ٹیزر لانچ ملتوی کردیا گیا ہے۔
بھارتی میڈیا کے مطابق فلم سکندر کے پروڈیوسرز نے آفیشل ایکس ہینڈل کے ذریعے بیان جاری کیا کہ ہمارے محترم سابق وزیراعظم من موہن سنگھ جی کے انتقال کی وجہ سے فلم ’سکندر‘ کا ٹیزر ریلیز 28 دسمبر تک ملتوی کردیا گیا ہے۔
سلمان خان کی سالگرہ پر فلم کے پروڈیوسرز نے شائقین کو اس وقت خوش کر دیا جب انہوں نے فلم سکندر میں سلمان کی لک والا پوسٹر جاری کیا۔ پوسٹر میں سلمان خان کو ایک سوٹ میں نیزا اٹھائے دکھایا گیا ہے، جس سے ان کی دبنگ جھلک ملتی ہے۔
واضح رہے کہ فلم ’سکندر‘ میں سلمان خان کے ساتھ اداکارہ راشمیکا مندانا اداکاری کرتی نظر آئیں گی، یہ فلم اگلے سال عید پر سنیما گھروں میں ریلیز کی جائے گی۔