آسٹریلوی بیٹر سٹیو سمتھ نے بھارت کیخلاف ٹیسٹ میں نیا ریکارڈ بنا دیا
کینبرا (قدرت روزنامہ) آسٹریلیا کے تجربہ کار بیٹر سٹیو سمتھ نے بھارت کے خلاف ٹیسٹ میچز میں نیا ریکارڈ بنا دیا۔
جیو نیوز کے مطابق جمعہ کو بارڈر گواسکر ٹرافی کے چوتھے باکسنگ ڈے ٹیسٹ کے دوسرے دن آسٹریلیا نے 311ر رنز 6 وکٹ سے اننگز آگے بڑھائی ، کپتان پیٹ کمنز تو 49 رنزبناکر آؤٹ ہوگئے مگر سٹیو سمتھ کا بلا رنز اگلتا رہا۔
سمتھ نے شاندار بیٹنگ کرتے ہوئے ٹیسٹ کیریئر کی 34 ویں سنچری اسکورکی ، وہ 140 رنزبناکر پویلین لوٹے جبکہ آسٹریلیا پہلی اننگز میں 474 رنزبناکر آؤٹ ہوئی۔سیریز کے چوتھے ٹیسٹ میں آسٹریلیا کے خلاف بھارتی ٹیم مشکلات کا شکار ہوئی، پہلی اننگز میں کینگروز کے 474 رنز کے جواب میں بھارتی ٹیم پہلی اننگز میں 164رنز پر 5 وکٹوں سے محروم ہوگئی۔
اس میچ میں شاندار 140 رنز بنانے والے آسٹریلوی بیٹر سٹیو سمتھ نے ٹیسٹ کرکٹ میں بھارت کے خلاف نیا ریکارڈ بھی بنایا۔ سٹیو سمتھ بھارت کے خلاف ٹیسٹ کرکٹ میں سب سے زیادہ سنچریاں بنانے والے بیٹر بن گئے ہیں۔
View this post on Instagram
جمعہ کو ٹیسٹ کیریئر کی 34 ویں سنچری بنانے والے سمتھ کی بھارت کے خلاف یہ 11ویں ٹیسٹ سنچری تھی جو انہوں نے 43 اننگز میں مکمل کی۔یہ ٹیسٹ کرکٹ میں کسی بھی بیٹر کی بھارت کے خلاف سنچریوں کی سب سے زیادہ تعداد ہے۔
اس فہرست میں دوسرا نمبر انگلینڈ کے جو روٹ کا ہے، جنہوں نے اب تک بھارت کے خلاف ٹیسٹ کرکٹ میں 10 سنچریاں اسکور کی ہیں۔
واضح رہے کہ آسٹریلیا اور بھارت کے درمیان 5 میچز پر مشتمل بارڈر گواسکر ٹرافی ایک ایک سے برابر ہے۔ سیریز کے پہلے ٹیسٹ میں بھارت کامیاب ہوا تھا جبکہ دوسرے میچ میں میزبان ٹیم نے کامیابی حاصل کی تھی۔سیریز کا تیسرا ٹیسٹ ڈرا ہوگیا تھا۔