پیا گھر سدھارنے کی تیاریاں، نیلم منیر کی مایوں کی تصاویر وائرل

اسلام آباد (قدرت روزنامہ)نیلم منیر پاکستان کی معروف ٹیلی ویژن اور فلمی اداکارہ ہیں، جن کے انسٹاگرام پر 7.7 ملین فالوورز ہیں، نیلم منیر کے قابل ذکر ٹیلی ویژن ڈراموں میں، قید تنہائی، اشک، قیامت، دل نواز، بکھرے موتی، محبت داغ کی صورت، کہیں دیپ جلے، دل موم کا دیا، احرام جنون اور خمار شامل ہیں، جبکہ ان کی ہٹ فیچر فلموں میں رانگ نمبر اور چکر شامل ہیں۔
نیلم منیر اب پیا گھر سدھارنے جارہی ہیں اور مایوں سے ان کی شادی کی تقریبات کا آغاز ہوگیا ہے۔
ادکارہ نے اپنے انسٹاگرام اکاؤنٹ پر اپنی شادی کی مایوں کی تقریب کی دلکش تصاویر شیئر کی ہیں، جن میں نیلم منیر کو خوبصورت پیلے کپڑوں میں دیکھا جاسکتا ہے، ان تقریبات میں نیلم نے حارث شکیل کا تیار کردہ خوبصورت پیلے رنگ کا کامدانی پشواز پہنا، ان کا لباس سونے کے کام سے مزین تھا۔
ایک تصویر میں نیلم منیر والدہ کے ساتھ خوشگوار موڈ میں موجود ہیں، اداکارہ کی مایوں کے موقع پر کروائے گئے خوبصورت فوٹو شوٹ کی تصاویر وائرل ہورہی ہیں جسے مداحوں کی جانب سے خوب سراہا جارہا ہے۔
یاد رہے کہ ماڈل نیلم منیر سے متعلق گزشتہ سال نومبر میں خبریں سامنے آئی تھیں کہ وہ دسمبر 2024 کے اختتام تک رشتہ ازدواج میں بندھ جائیں گی، تاہم ایک پوڈکاسٹ میں انہوں نے ذاتی زندگی سے متعلق پوچھے گئے سوال پر وضاحت کی تھی اور بتایا تھا کہ فی الحال ان کا شادی کا کوئی ارادہ نہیں۔
اداکارہ سے جب پوچھا گیا کہ کیا وہ کسی سے تعلقات میں ہیں یا ان کی زندگی میں کوئی شخص آنے والا ہے یا پھر ان کا شادی کا کوئی ارادہ ہے؟ تو اداکارہ نے نفی میں جواب دیا کہ ابھی ان کا شادی کا کوئی ارادہ نہیں۔
نیلم منیر نے مختصر جواب دیا کہ ان کا فی الحال رشتہ ازدواج میں بندھنے کا کوئی ارادہ نہیں، مستقبل میں دیکھا جائے گا۔