کبریٰ خان اور گوہر رشید کی شادی کی تیاریاں؟ ڈانس ویڈیو وائرل

اسلام آباد (قدرت روزنامہ)سوشل میڈیا پر قیاس آرائیاں کی جارہی ہیں کہ معروف اداکارہ کبریٰ خان اور مرزا گوہر رشید کی شادی کی تیاریاں شروع ہو چکی ہیں۔
اداکار مرزا گوہر رشید نے فوٹو اینڈ ویڈیو شیئرنگ ایپ انسٹاگرام پر ایک ویڈیو شیئر کی جس میں کبریٰ خان، اشنا شاہ، مومل شیخ، اذان سمیع، شازیہ وجاہت، وجاہت رؤف، عاشر وجاہت اور دیگر کو ڈانس پریکٹس کرتے دیکھا جا سکتا ہے اور ہیش ٹیگ میں انہوں نے لکھا ’میرے یار کی شادی ہے‘ جس پر صارفین کی جانب سے مختلف تبصرے کیے جا رہے ہیں۔
متعدد صارفین کا کہنا کہ وہ کبریٰ خان اور گوہر رشید کی شادی کا بے صبری سے انتظار کر رہے ہیں تو بعض صارفین کا خیال ہے کہ اداکارہ کبریٰ خان کی شادی گوہر رشید سے نہیں بلکہ کسی اور کے ساتھ ہو رہی ہے اور تمام دوست اس کی تیاریوں میں مصروف ہیں۔
گزشتہ روز ایک ویڈیو شیئر کرتے ہوئے گوہر رشید نے کیپشن میں بسم اللّٰہ 2025ء لکھا اور ساتھ میں بتایا ہے کہ ایونٹ کے لیے تیاریوں کا آغاز کیا جا رہا ہے۔ جس پر قیاس آرائیاں کی جانے لگیں کہ کبریٰ خان اور گوہر رشید بہترین دوست ہیں جنہیں برسوں سے ساتھ دیکھ رہے ہیں اور اب وہ جلد شادی کرنے والے ہیں۔
دوسری جانب کبریٰ خان نے بھی انسٹاگرام پر گوہر رشید کی اسٹوری شیئر کرتے ہوئے لکھا بے شک میرے یار کی شادی ہے۔
واضح رہے مقبول اداکار گوہر رشید نے کچھ عرصہ قبل محبت کا اعتراف کرتے ہوئے جلد شادی کرنے کا عندیہ بھی دیا تھا۔ انہوں نے اشنا شاہ کے شو میں شرکت کی، جہاں انہوں نے محبت سے متعلق کھل کر بات کی۔
ایک سوال کے جواب میں اداکار نے مسکراتے ہوئے بتایا کہ انہوں نے شریک حیات تلاش کرلی ہے اور اب ان کے بغیر زندگی گزارنا ان کے لیے مشکل بن چکا ہے۔ گوہر رشید کا کہنا تھا کہ وہ دونوں ایک دوسرے کو کافی عرصے سے جانتے ہیں جبکہ وہ انتہائی خوبصورت اور بہترین شخصیت کی مالک خاتون ہیں۔
گوہر رشید کی جانب سے محبت کا اعتراف کیے جانے اور جلد شادی کا عندیہ دیے جانے پر میزبان اداکار اشنا شاہ نے بھی ان کی ہونے والی شریک حیات کی تعریفیں کیں اور کہا کہ وہ دونوں کو جانتی ہیں، دونوں ہی اچھے انسان ہیں۔