2025 میں دنیا کے بہترین سیاحتی مقامات میں پاکستانی علاقہ بھی شامل
اسلام آباد (قدرت روزنامہ)2025 میں چھٹیاں منانے کیلئے دنیا کے بہترین سیاحتی مقامات میں پاکستان کا ایک علاقہ بھی شامل ہوگیا۔
برطانوی اخبارفنانشل ٹائمز نے 2025 میں دنیا کے 50 بہترین سیاحتی مقامات کی فہرست جاری کی ہے۔
فنانشل ٹائمز نے پاکستان کے گلگت بلتستان کو 2025 میں بہترین سیاحتی مقامات میں شامل کیا ہے۔
فنانشل ٹائمز نے لکھا کہ گلگت بلتستان میں دنیا کے سب سے شاندار پہاڑی مناظر موجود ہیں اور بہتر سکیورٹی، آسان رسائی اور بہتر رہائش کی سہولیات کے باعث زیادہ سیاح یہاں کا رخ کر رہے ہیں۔
فنانشل ٹائمز کے مطابق پاکستان نے اگست 2024 میں 120 سے زائد ممالک کے شہریوں کے لیے آن لائن ویزا کی سہولت فراہم کی جبکہ یہاں 14 روزہ گروپ ٹورز بھی شروع کیے جا رہے ہیں، یہ ٹورز خطے کی ثقافت، تاریخ اور مناظر میں گہری دلچسپی فراہم کرتے ہیں اور اس میں 6 دن کی ٹریکنگ بھی شامل ہے۔
واضح رہے کہ اس ماہ کے اوائل میں امریکی نشریاتی ادارے سی این این نے بھی گلگت بلتستان کو 2025 میں سیاحت کیلئے دنیا کے 25 بہترین مقامات کی فہرست میں شامل کیا۔