پاکستان میں سونے کو دوبارہ پر لگ گئے، قیمت میں بڑا اضافہ

کراچی (قدرت روزنامہ)پاکستان میں سونے کی قیمت میں مسلسل دوسرے روز بھی بڑا اضافہ دیکھنے میں آ رہا ہے۔
آل پاکستان صراف اینڈ جیولرز ایسوسی ایشن کے مطابق عالمی اور مقامی مارکیٹوں میں سونے کے نرخ آج دوسرے روز بھی بڑھ گئے، پاکستان میں فی تولہ سونے کی قیمت میں 1400 روپے کا اضافہ ہو گیا۔
مقامی صرافہ مارکیٹوں میں جمعرات کو بھی 24 قیراط کے حامل فی تولہ سونے کی قیمت 1400 روپے کے اضافے سے 2 لاکھ 82 ہزار 200 روپے کا ہوگیا جبکہ 10 گرام سونے کی قیمت بھی 1200 روپے کے اضافے سے 2 لاکھ 41 ہزار 941 روپے کی سطح پر آگئی۔
علاوہ ازیں ملک میں فی تولہ چاندی کی قیمت 83 روپے کے اضافے سے 3433 روپے اور فی 10 گرام چاندی کی قیمت بھی 71 روپے کے اضافے سے 2943 روپے کی سطح پر آگئی۔
بین الاقوامی بلین مارکیٹ میں فی اونس سونے کی قیمت میں 13 ڈالر کا اضافہ ہونے سے نئی عالمی قیمت 2703 ڈالر کی سطح پر آگئی۔
واضح رہے کہ گزشتہ روز بھی سونے کی قیمتوں میں اضافہ ہوا تھا، جس کے مطابق عالمی قیمت میں 29 ڈالر فی اونس اور مقامی سطح پر 2900 روپے فی تولہ سونا مہنگا ہوگیا تھا۔