بگ باس 18 کا ٹائٹل اداکار کرن ویر مہرا نے جیت لیا
اسلام آباد (قدرت روزنامہ)معروف بھارتی رئیلٹی شو بگ باس کے سیزن 18 کا ٹائٹل ٹی وی اداکار کرن ویر مہرا نے جیت لیا۔
ساڑھے 3 ماہ سے زائد جاری رہنے والا بگ باس 18اداکار کرن ویر مہرا کی جیت کے ساتھ اختتام پذیر ہوگیا۔
بگ باس 18 کے فائنل میں کرن ویر مہرا نے اپنے ساتھی ویوین ڈسینا کو شکست دی جبکہ رجت دلال نے اس مقابلے میں تیسری پوزیشن حاصل کی۔
بگ باس 18 کے فائنل میں ایشا سنگھ، اویناش مشرا،چم دارنگ، کرن ویر مہرا، ویوین ڈسینا اور رجت دلال سمیت 6 کنٹسٹنٹ پہنچے تھے۔
رئیلٹی شو بگ باس کے میزبان سلمان خان نے ٹاپ 2 فائنلسٹ کرن ویر مہرا اور ویوین ڈسیناکو اسٹیج پر بلایا اور پھر فاتح کا اعلان کیا۔
بھارتی میڈیا کے مطابق کرن ویر مہرا کو 50 لاکھ بھارتی روپے کی انعامی رقم اور ایک چمچماتی ٹرافی دی گئی۔
کرن ویر مہرا اس سے قبل گزشتہ سال معروف بھارتی شو خطروں کے کھلاڑی سیزن 14 کا ٹائٹل بھی جیت چکے ہیں۔
واضح رہے کہ بگ باس میں فاتح کا انتخاب عوام کے ووٹوں کی بنیاد پر کیا جاتا ہے۔بگ باس کا گزشتہ سیزن کامیڈین منور فاروقی نے جیتا تھا۔