بشریٰ بی بی کا اصل ترجمان کون؟ پی ٹی آئی کے سیکریٹری جنرل نے بتا دیا

اسلام آباد (قدرت روزنامہ)پاکستان تحریک انصاف کے سیکریٹری جنرل سلمان اکرم راجا نے کہا ہے کہ مشعال یوسفزئی، بشریٰ بی بی کی حد تک ترجمان ہیں، ان کو بشریٰ بی بی پر اسلام آباد اور راولپنڈی میں قائم مقدمات میں کوآرڈینیشن کی ذمہ داری دی گئی ہے۔
اڈیالہ جیل کے باہر میڈیا سے گفتگو کے موقع پر بانی پی ٹی آئی کی اہلیہ بشریٰ بی بی کی ترجمان مشعال یوسفزئی ہیں یا مسرت جمشید چیمہ؟ اس حوالے سے کیے پوچھے گئے سوال پر سلمان اکرم راجا کا کہنا تھا کہ مشعال یوسفزئی بشریٰ بی بی کی ترجمان ہیں۔ پارٹی کے اپنے عہدے ہیں۔ پارٹی کی ترجمانی پارٹی کے عہدیداران اور ترجمان ہی کریں گے۔
ان کا کہنا تھا کہ مشعال یوسفزئی، بشریٰ بی بی کی حد تک ترجمان ہیں، ان کو بشریٰ بی بی پر اسلام آباد اور راولپنڈی میں قائم مقدمات میں کوآرڈینیشن کی ذمہ داری دی گئی ہے۔
عالیہ حمزہ کے حوالے سے سوال پر ان کا کہنا تھا کہ عالیہ حمزہ ہماری بہت متحرک کارکن ہیں، خان صاحب چاہتے ہیں کہ ان کا بڑا رول دیا جائے، اس کے لیے ہم بیٹھیں گے۔ پی ٹی آئی پنجاب کی جو لیڈر شپ ہے، اس کے ساتھ بیٹھ کر ایک لائحہ عمل طے ہوگا جس میں عالیہ حمزہ صاحبہ کو ذمہ داری دیے جانے سے متعلق فیصلہ ہوگا۔
شیر افضل مروت کو دیے جانے والے شوکاز نوٹس سے متعلق سوال پر سلمان اکرم راجا کا کہنا تھا کہ میرا اس معاملے سے براہ راست تعلق نہیں ہے، شوکاز جب دیا جاتا ہے تو اس کا جواب لیکر کوئی فیصلہ کیا جاتا ہے، یہ فیصلہ پارٹی کرے گی۔