راکھی ساونت کس پاکستانی اداکار سے شادی کرنے والی ہیں؟

اسلام آباد (قدرت روزنامہ)بالی ووڈ اداکارہ راکھی ساونت نے پاکستان میں شادی کا اعلان کر دیا۔ ان کا کہنا ہے کہ انہیں پاکستانی اداکار دودی خان نے شادی کی پیشکش کی ہے۔
اپنے آڈیو پیغام میں اداکارہ کا کہنا تھا کہ انہیں پاکستان سے بہت رشتے آئے ہیں لیکن انہوں نے دودی خان کو چنا ہے۔ راکھی ساونت نے کہا کہ ان کو 5وقت کا نمازی لڑکا چاہیے جو مولانا ٹائپ ہو اور پاکستانی لڑکے نمازی ہوتے ہیں۔
راکھی ساونت کا کہنا ہے کہ وہ اسلامی طریقے کے مطابق پاکستان میں شادی کریں گی جبکہ ان کا ہنی مون سوئٹزرلینڈ میں ہوگا اور وہ دبئی میں ہی رہائش پذیر ہوں گی۔ ان کا کہنا تھا کہ وہ اپنی شادی میں پاکستانی میڈیا کو ضرور بلائیں گی۔ راکھی ساونت نے بچوں کے حوالے بات کرتے ہوئے کہا کہ انہوں نے ابھی سوچا نہیں ہے کہ ان کے بچے پاکستان میں ہوں گے یا بھارت میں۔
راکھی ساونت نے یہ بھی کہا کہ وہ عمران خان سے ملنا چاہتی ہیں اور انہیں سپورٹ کرتی ہیں اور انہیں جیل سے چھڑوانا چاہتی ہیں۔
واضح رہے کہ اداکار دودی خان کی جانب سے بھی انسٹا گرام اکاؤنٹ پر ایک ویڈیو شیئر کی گئی تھی جس میں وہ کہتے ہیں کہ ’السلام علیکم راکھی جی، سب سے پہلے آپ کو عمرہ مبارک ہو اور اس کے بعد پاکستان میں دلی خوش آمدید‘۔ انہوں نے راکھی سے پوچھا کہ یہ بتائیں بارات لے کر بھارت آنا ہے یا دبئی؟ اور ساتھ ہی انہوں نے راکھی ساونت سے اظہار محبت کرتے ہوئے انہیں ’لویو‘ کہا۔
راکھی ساونت کو شادی کی پیشکش کرنے والے اداکار دودی خان کے مشہور ڈراموں میں اے عشق جنون، کھائی، اکھاڑا اور میری ہمنشین شامل ہیں۔
خیال رہے کہ بالی ووڈ اداکار راکھی ساونت نے 2 شادیاں کی تھیں اور دونوں ناکام ہوئیں۔ پہلی شادی رتیش نامی بزنس مین سے ہوئی جو چند ماہ ہی چل سکی اس کے بعد انہوں نے اسلام قبول کرکے عادل درانی سے شادی کی تھی۔
ماضی میں اداکارہ کہتی رہی ہیں کہ جب تک انہیں بہتر جیون ساتھی نہیں مل جاتا وہ شادی کرتی رہیں گی۔