صبا قمر ہسپتال میں داخل، دعاؤں کی اپیل کردی

کراچی (قدرت روزنامہ) معروف اداکارہ صبا قمر نے سوشل میڈیا سے اپنی غیر حاضری کی وجہ ظاہر کردی، اداکارہ طبیعت انتہائی ناساز ہونے کے سبب ہسپتال میں داخل ہیں۔حال ہی میں اداکارہ نے فوٹو اینڈ ویڈیو شیئرنگ ایپ انسٹاگرام پر سٹوری شیئر کرتے ہوئے اپنی ایک تصویر شیئر کی جس میں وہ ہسپتال میں زیرِ علاج نظر آرہی ہیں جبکہ ان کی عیادت کے لیے ساتھی اداکار بھی ان کے پاس موجود ہیں۔

اداکارہ نے تصویر کے ساتھ شیئر کردہ نوٹ میں مداحوں کو مخاطب کرتے ہوئے بتایا کہ مجھے معلوم ہے کہ آپ میں سے بہت سے لوگ میرے لیے فکرمند تھے اس لیے میں آپ کو بتانا چاہتی ہوں کہ مجھے انتہائی شدید ڈائیریا ہوگیا تھا۔ادکارہ نے لکھا کہ الحمد اللہ اب میں بہت بہتر محسوس کررہی ہوں، میں صحت یاب ہورہی ہوں اور میری بہترین ٹیم میری دیکھ بھال کررہی ہے۔صبا نے لکھا کہ آپ کا پیار اور دعائیں میرے لیے بہت معنی رکھتی ہیں اور میں وعدہ کرتی ہوں کہ میں بہت بہت جلد واپس آئوں گی، آپ سب برائے مہربانی مجھے اپنی دعائوں میں یاد رکھیں۔اداکارہ کی عیادت کے لیے اسپتال پہنچنے والے اداکاروں میں حنا خواجہ بیات، آمنہ شیخ، رشنا خان اور عائشہ شامل تھے۔