چیف جسٹس نہ ہونے پر کسی سے شکوہ نہیں، سینئر جج ہونے پر خوش ہوں، جسٹس منصور علی شاہ

کراچی (قدرت روزنامہ)سپریم کورٹ کے سینئر جج جسٹس منصور علی شاہ نے کہا ہے کہ مجھے کسی سے کوئی شکوہ نہیں کہ میں اس وقت چیف جسٹس نہیں ہوں، حلف کے ساتھ کھڑے رہیں تو کوئی مسئلہ نہیں آئے گا، حلف لینا صرف الفاظ نہیں ہوتے اس کے گہرے معنی ہوتے ہیں۔
کراچی بار ایسوسی ایشن کے نومنتخب عہدیداران کی تقریب حلف برداری سے خطاب کرتے ہوئے جسٹس منصور علی شاہ نے کہا کہ یہاں مدعوں کرنے کا بہت شکریہ، میرے لیے باعث فخر ہے کہ میں یہاں ہوں، میں اس وقت سینئر پیونی جج ہوں اور اس میں ہی خوش ہوں، مجھے کوئی شکوہ نہیں کسی سے کہ میں اس وقت چیف جسٹس نہیں ہوں، اس وقت کے چیف جسٹس آف پاکستان بہت اچھے ہیں ان کے لیے دعاگو ہوں۔
جسٹس منصور علی شاہ نے کہا کہ ججز پر دباؤ ڈالا جائے گا لیکن حلف کے ساتھ ہی چلنا ہے، حلف توڑنے سے سارا نظام ٹوٹ جائے گا، حلف لینا صرف الفاظ نہیں ہوتے اس کے گہرے معنی ہوتے ہیں، جب بھی آپ پر کوئی مشکل آئے حلف پڑھ لینا، اگر آپ حلف کے ساتھ کھڑے رہیں تو کوئی مسئلہ نہیں آئے گا،
سپریم کورٹ کے سینئر جج نے مزید کہا کہ حلف ایسا ہی ہے جسے پانی ہاتھ میں لے کر کھڑے ہیں، حلف کو سنبھالنا ہے تو پھر ہاتھ نہیں کھولنا اسی طرح رکھنا ہے، ہم نے چیزوں کو آگے لے کر چلنا ہے، بہت مشکلات آئیں گی لیکن آپ نے اپنے حلف کو نہیں چھوڑنا۔
اس موقع پر جسٹس منصور علی شاہ نے شاعر مشرق علامہ اقبال کا مشہور زمانہ شعر بھی پڑھا کہ پرواز ہے دونوں کی اسی ایک فضا میں کرگس کا جہاں اور ہے، شاہیں کا جہاں اور
قبل ازیں، جسٹس منصور علی شاہ نے کراچی بار ایسوسی ایشن کے نو منتخب عہدیداران سے حلف لیا، اس موقع پر وکلا نے جسٹس منصور علی شاہ کے حق میں فلک شگاف نعرے بھی لگائے۔