چیمپئنز ٹرافی کیلئے سکواڈ کا اعلان، سلیکٹر اسد شفیق نے اہم بیان جاری کردیا

لاہور (قدرت روزنامہ) ممبرقومی سلیکشن کمیٹی اسد شفیق کا کہنا ہے کہ سلیکٹرز نے چیمپئنز ٹرافی 2025 کے لیے موزوں کرکٹرز کے انتخاب کا طریقہ اپنانا جاری رکھا ہے۔ ہماری توجہ ایسے کھلاڑیوں کے انتخاب پر مرکوز ہے جنہوں نے اسی طرح کے حالات میں ڈومیسٹک مقابلوں میں مستقل طور پر بہترین کارکردگی کا مظاہرہ کیا ہو۔

چیمپیئنز ٹرافی کیلئے سکواڈ کا اعلان کرتے ہوئے اسد شفیق نے کہا کہ سپنر ابرار احمد اور مڈل آرڈر بیٹرز کامران غلام اور طیب طاہر جیسے ابھرتے ہوئے کھلاڑیوں کی شمولیت ڈومیسٹک سطح پر کامیابی کو بین الاقوامی سطح پر منتقل کرنے کی ان کی صلاحیت پر ہمارے اعتماد کی عکاسی کرتی ہے۔ ان کھلاڑیوں نے مشکل ماحول میں مہارت کا مظاہرہ کیا ہے ، انہیں ہوم کنڈیشنز کی گہری سمجھ ہے ۔ ابرار احمد اسپن ٹیک کی قیادت کریں گے اور ان کے ساتھ خوشدل شاہ اور سلمان علی ہوں گے ، جبکہ فہیم اشرف کا تجربہ اور موجودگی ہمیں فاسٹ بولنگ آل راؤنڈر کا آپشن فراہم کرتی ہے۔

انہوں نے کہا کہ ٹیم میں فخر زمان کی واپسی ہمارے ٹاپ آرڈر کے لیے حوصلہ افزا ہے۔ ان کا جارحانہ انداز اور میچ جیتنے کی صلاحیتیں ہمارے منصوبوں کے لیے اہم ہیں۔ اسی طرح سعود شکیل کو بیٹنگ کو مزید تقویت دینے اور ٹیسٹ کرکٹ میں ان کی بھرپور فارم سے فائدہ اٹھانے کے لیے تیار کیا گیا ہے۔ وہ ایک تجربہ کار، ذہین اور سمجھ بوجھ والے بیٹر ہیں جو اپنی اننگز کو سوچ سمجھ کر بناتے ہیں ، وہ پارٹنرشپ قائم کرنے میں مہارت رکھتے ہیں۔

اسد شفیق کا کہنا تھا کہ فخر کا اوپننگ پارٹنر بابر اعظم یا سعود شکیل ہو سکتے ہیں، اس کا انحصار کنڈیشنز، حریف ٹیم اور میچ کی حکمت عملی پر ہوگا۔ دونوں کھلاڑی ٹاپ آرڈر میں انتہائی قابل ہیں۔ بابر خاص طور پر اس کردار میں تجربہ کار ہیں، وہ باقاعدگی سے ٹی ٹوئنٹی میں کھیل رہے ہیں اور کیپ ٹاؤن ٹیسٹ میں بھی صائم ایوب کی غیر موجودگی میں دو نصف سنچریاں بنا کر شاندار کارکردگی کا مظاہرہ کر چکے ہیں۔ صائم ایوب کو ٹخنے کی انجری کی وجہ سے ٹیم میں شامل نہیں کیا گیا ہے لیکن ہم ان کی صحت یابی کے لیے پر امید ہیں۔ ہم سمجھ سکتے ہیں کہ وہ آئی سی سی چیمپیئنز ٹرافی 2025 کا کتنا انتظار کر رہے تھے اور یہ تسلیم کرتے ہیں کہ عالمی ایونٹ سے محروم ہونا ان کے لیے کتنا تکلیف دہ ہوگا ۔

انہوں نے کہا کہ آئی سی سی چیمپیئنز ٹرافی 2025 سے قبل نیوزی لینڈ اور جنوبی افریقہ کے خلاف سہ ملکی ون ڈے سیریز نہ صرف تیاری کے طور پر کام کرے گی بلکہ مسابقتی حالات میں ہماری حکمت عملی کو بہتر بنانے کے لیے ایک پلیٹ فارم کے طور پر بھی کام کرے گی۔ ہوم گراؤنڈ پر چیمپئنز ٹرافی کا دفاع کرنے سے پہلے کھلاڑیوں کو فائنل ٹچ اپ دینے کا یہ بہترین موقع ہے۔ ہمیں یقین ہے کہ یہ سکواڈ نوجوانوں اور تجربے کے درمیان صحیح توازن قائم کرتا ہے، اور اس میں تمام بنیادی باتیں شامل ہیں۔ ہر کھلاڑی کا انتخاب ایک واضح کردار کو ذہن میں رکھتے ہوئے کیا گیا ہے اور اس بات کو یقینی بناتے ہوئے کہ کپتان کے پاس ورسٹائل آپشنز موجود ہیں۔
خیال رہے کہ پی سی بی نے چیمپیئنز ٹرافی کیلئے 15 رکنی قومی کرکٹ ٹیم کے سکواڈ کا اعلان کردیا ہے۔ پی سی بی کے مطابق 15 کھلاڑیوں پر مشتمل سکواڈ میں چار تبدیلیاں کی گئی ہیں ۔عبداللہ شفیق، محمد عرفان خان، صائم ایوب اور سفیان مقیم کی جگہ فہیم اشرف، فخرزمان ، خوشدل شاہ اور سعود شکیل کو ٹیم میں شامل کیا گیا ہے۔
سپیشلسٹ سپنر کے طور پر ابرار احمد جب کہ فاسٹ بولرز کے طور پر حارث رؤف، محمد حسنین، نسیم شاہ اور شاہین شاہ آفریدی کو ٹیم میں جگہ ملی ہے۔