چیمپئنز ٹرافی، پاک بھارت میچ سے قبل دبئی میں ہوٹل کرایوں میں ہوشربا اضافہ، انڈسٹری ماہرین کی پیشنگوئی بھی آگئی

دبئی (قدرت روزنامہ )دبئی کی سیاحتی انڈسٹری نے آئی سی سی چیمپئنز ٹرافی 2025 میں 23 فروری کو ہونے والے پاک بھارت ٹاکرے سے قبل فلائٹ اور ہوٹل کرایوں میں ہوشربا اضافے کی تیاری کر لی ہے ۔میڈیا رپورٹس کے مطابق سیاحتی کمپنیوں نے گزشتہ چند ہفتوں میں جہاز کے کرایوں اور ہوٹل کی بکنگ میں اضافہ دیکھا گیا ہے۔ یہ رجحان ماضی میں ہونے والے اس ہائی پروفائل مقابلے سے قبل بھی دیکھا گیا۔
انڈسٹری کے ماہرین نے پیش گوئی کی ہے کہ بھارت، پاکستان اور دیگر ممالک کے مداح اپنے سفری معاملات کو آئندہ دنوں میں حتمی شکل دیں گے، جس میں انہیں بکنگ اور فضائی کرایوں میں 20 سے 50 فی صد اضافے کا سامنا ہوگا، جبکہ آخری لمحات میں کرائے ممکنہ طور پر دگنے ہوجائیں گے۔ایک سیاحتی کمپنی کے عہدے دار کا کہنا تھا کہ ایک واضح رجحان دیکھا گیا ہے کہ پاک بھارت میچ سے قبل جہاز کے ٹکٹ اور ہوٹل کی ڈیمانڈ میں اضافہ دیکھا جاتا ہے۔

واضح رہے کہ کرکٹ ورلڈ کپ 2023 میں پاک بھارت میچ سے قبل ہوٹل کے کرایوں میں 1550 اضافہ دیکھا گیا تھا۔ آخری لمحات میں دبئی میں بھی یہ اضافہ متوقع ہے۔ ایک اور کمپنی کے عہدے دار کا کہنا تھا کہ بکنگ میں بتدریج اضافہ ہو رہا ہے اور اصلی اضافہ میچ سے قبل دو ہفتوں میں ہوگا۔