وزیراعلیٰ پنجاب مریم نواز30سال بعدلاہور میں عالمی معیار کے ہارس اینڈ کیٹل شوکاافتتاح کریں گی
لاہور ( قدرت روزنامہ )وزیراعلیٰ پنجاب مریم نواز نے عالمی معیار کا ہارس اینڈ کیٹل شو منعقد کرانے کا اعلان کیا تھا جس کے تحت پنجاب حکومت عالمی معیار کا ہارس اینڈ کیٹل شو منعقد کرنے جارہی ہے۔ ہارس اینڈ کیٹل شوکا انعقاد پنجاب کی شاندار روایات، ثقافت کے فروغ اور کسانوں کی حوصلہ افزائی کے لیے ایک اور بڑا قدم ہے۔ وزیراعلیٰ 9 فروری کو ”ہارس اینڈ کیٹل شو 2025 کا افتتاح کریں گی۔”ہارس اینڈ کیٹل شو2025“ کا عنوان”اتحاد، ترقی اور ثقافت کی بحالی“ ہے۔
وزیراعلیٰ مریم نواز کی ہدایت پر 3 روزہ نیشنل ہارس اینڈ کیٹل شو لاہور 10 فروری سے شروع ہوگا جس میں 30 سال بعدپہلی بار 70 بین الاقوامی ٹیمیں بھی شو کا حصہ بنیں گی۔ پہلی بار 1964ء میں نیشنل ہارس اینڈ کیٹل شو کا انعقاد ہوا تھا، آخری بار ”ہارس اینڈ کیٹل شو“ 1995ء میں منعقد کیا گیا تھا۔ بین الاقوامی ٹیموں کی شرکت سے ہونے والا ہارس اینڈ کیٹل شو 9 سے 23 فروری 2025 تک لاہور کے مختلف مقامات پر منعقد ہوگا۔ گھوڑوں اور پالتو جانوروں کے اس روایتی میلے میں کسانوں کو پالتواور مفید جانوروں کی نمائش کا موقع ملتا ہے، انعامات سے اُن کی حوصلہ افزائی بھی کی جاتی ہے۔ ہارس اینڈ کیٹل شو میں نیزہ بازی، تیراندازی، بُزکشی، پولو کے مقابلے ہوں گے، گھڑ سوار اپنی صلاحیتوں کا مظاہرہ کریں گے۔ ثقافتی تہوار، پھولوں کی نمائش اور آرائش گل کے مقابلے بھی منعقد ہوں گے۔
13 سے 23 فروری تک بچوں کی دلچسپی کے کھیل اور دیگر تفریحی تقریبات ہوں گی۔ پنجاب کے روایتی کھانوں، مشروبات اور موسیقی کے فروغ کے لیے 14 سے 16 فروری موسیقی کے میلے منعقد ہوں گے۔ پنجاب کے صوفیوں، بزرگوں کو خراج عقیدت پیش کرنے اور ان کی تعلیمات کو عام کرنے کے لیے 19 فروری کو صوفی فیسٹیول بھی ہوگا۔ پنجاب کے روایتی کبڈی کے کھیلوں کے مقابلے 18 اور 19 فروری کوہوں گے۔ نایاب گاڑیوں کے شوقین افراد کے لیے کار شو 16 فروری کو ہوگا۔
وزیراعلیٰ مریم نواز نے کہا ہےکہ ہارس اینڈ کیٹل شو کسانوں سمیت پنجاب کے ہر طبقے کے لوگوں کے لیے تحفہ ہے۔گھوڑوں اور پالتو جانوروں کے میلے پنجاب کی ثقافت اور زراعت دونوں کے فروغ کا باعث بنیں گے۔ 30 سال بعد عالمی ٹیموں کی شرکت سے ہارس اینڈ کیٹل شو کو اصل حالت میں بحال کیا ہے۔ پنجاب کی زراعت اور ماضی کی درخشندہ روایات کی بحالی پنجاب اور اس کے عوام سے ہماری محبت کا مظہر ہے۔ پنجاب کی زراعت، کسان کی ترقی، مہمان نوازی، خوبصورت ثقافت اور روایات کا فروغ ہماری اولین ترجیح ہے۔ یہ روایتی میلے پنجاب کے عوام کے اتحاد، ہم آہنگی اور یک جہتی کے فروغ کا بھی اہم ذریعہ ہیں۔پنجاب محبتوں کی سرزمین ہے، یہاں نفرتوں کی گنجائش نہیں۔
وزیر اعلیٰ مریم نواز نے ہارس اینڈ کیٹل شو کے انعقاد کے لیے سینئرصوبائی وزیر مریم اورنگزیب کی سربراہی میں سٹیئرنگ کمیٹی قائم کی تھی۔سینئر صوبائی وزیر مریم اورنگزیب کی رہنمائی میں پارکس اینڈہارٹیکلچر اتھارٹی(پی ایچ اے) گزشتہ چار ماہ سے ہارس اینڈ کیٹل شو کی تیاری کر رہی تھی۔