وزیراعلیٰ پنجاب کی دیگر صوبوں کے طلبہ کیلئے ہونہار اسکالر شپ کی منظوری

لاہور (قدرت روزنامہ)وزیراعلیٰ پنجاب مریم نواز شریف نے دیگر صوبوں کے طلبہ کے لیے ہونہار اسکالر شپ سکیم کی منظوری دے دی اور کہا کہ میرٹ پر آنے والا ہر بچہ اچھے کالج میں اپلائی کرے فیس ہم دیں گے، طلبہ کے لیے کسی بھی سکیم میں فنڈز کی فراہمی رکاوٹ بننے نہیں دی جائے گی۔
وزیراعلیٰ پنجاب مریم نواز کی زیر صدارت اہم اجلاس ہوا، جس میں ہائر ایجوکیشن سے متعلق اہم فیصلے کرلیے گئے جبکہ اجلاس میں پنجاب میں ایک روزہ وی سی کانفرنس،ٹیک ایکسپوکی منظوری بھی دی گئی دیگر صوبوں کے طلبہ کے لیے بھی پنجاب کی طرح اہلیت کا یکساں معیار مقرر کر لیا گیا۔
مریم نواز نے پنجاب میں طلبہ کے لئے لیپ ٹاپ کی تعداد بڑھا کر ایک لاکھ 10ہزار کردی جبکہ انہوں نے پنجاب میں سیکنڈ ائیر، تھرڈ ائیراور فور تھ ا ئیرکے لئے ہونہار سکالرشپ کی باضابطہ منظوری دے دی۔
وزیراعلیٰ پنجاب نے ہونہار اسکالرشپ اور لیپ ٹاپ اسکیم کے طلبہ کے لیے خصوصی ہیلپ لائن قائم کرنے کی ہدایت کردی جبکہ پنجاب میں لیپ ٹاپ حاصل کرنے کے لئے کم از کم 65 فیصد اہلیت مقرر کردی گئی۔
اس موقع پر مریم نوازشریف نے کہا کہ ہونہار اسکالرشپ اور لیپ ٹاپ ہر بچے کا حق اور حکومت کی ذمہ داری ہے، تعلیم اور یوتھ قوم کی حقیقی انویسٹمنٹ ہے، دل چاہتا ہے ہر بچے کو لیپ ٹاپ ملے، لیپ ٹاپ اور ہونہار اسکالرشپ دیگر صوبوں کے طلبہ کا بھی حق ہے، آزاد کشمیر، گلگت بلتستان، بلوچستان اور خیبرپختونخوا سمیت دیگر صوبوں کے طلبہ بھی ہمارے بچے ہیں۔
ان کا مزید کہنا تھا کہ میرٹ پر آنے والا ہر بچہ اچھے کالج میں اپلائی کرے فیس ہم دیں گے۔ ماں کی طرح سوچتی ہوں ہربچے کی قسمت بدلنا چاہتے ہیں۔ ہونہار اسکالر شپ کے لیے جو پنجاب کا معیار ہے وہی دیگر صوبوں کے طلبا کے لیے مقرر کیا جائے گا۔ طلبا کے لیے کسی بھی اسکیم میں فنڈز کی فراہمی کو رکاوٹ نہیں بننے دیا جائے گا۔ اجلاس میں پنجاب میں ایک روزہ وی سی کانفرنس اور ٹیک ایکسپوکی منظوری بھی دی گئی۔