’ بس میچ کی ٹکٹ نہ مانگا کریں کیونکہ ۔۔‘ نسیم شاہ نے پیغام جاری کر دیا

لاہور (قدرت روزنامہ )قومی ٹیم کے فاسٹ باؤلر نسیم شاہ نے میچ کے ٹکٹ مانگنے والوں سے معذرت کر لی ہے ۔

تفصیلات کے مطابق پاکستان کرکٹ بورڈ کے پوڈ کاسٹ میں بات کرتے ہوئے نسیم شاہ کا کہنا تھا کہ انجری کے بعد ری ہیب کر کے واپس آنا کسی بھی کھلاڑی کے لیے بہت مشکل ہوتا ہے۔انہوں نے کہا کہ نئے بال کا اپنا ایک پریشر ہوتا ہے اور نئے بال سے وکٹ لینا بہت اہم ہوتا ہے، فاسٹ باؤلر نے کہا کہ کوشش ہوتی ہے کہ ون ڈے کرکٹ میں ڈسپلن کے ساتھ باؤلنگ کراؤں۔

ایک سوال کا جواب دیتے ہوئے انہوں نے کہا کہ ٹیل اینڈرز کی جب پارٹنر شپ لگتی ہے تو اس وقت باؤلرز مایوس ہوتے ہیں، ان کا کہنا تھا کہ اس کو دیکھتے ہوئے میں بھی پارٹنر شپ لگانے کی کوشش کرتا ہوں۔ قومی ٹیم کے فاسٹ باؤلر نے کہا کہ میں کلب جا کر اپنی بیٹنگ پر کام کرتا ہوں اور کوشش کرتا ہوں کہ جلد وکٹ نہ دوں،انہوں نے انکشاف کرتے ہوئے کہا کہ میں کلب کے میچ میں اوپننگ کرتا ہوں۔

انہوں نے پوڈ کاسٹ میں گفتگو کرتے ہوئے کہا کہ چیمپیئنز ٹرافی کے لیے پرجوش اور تیار بھی ہیں، شائقین یہاں اسٹارز کو کھیلتا ہوا دیکھیں گے،ان کاکہنا تھا کہ ہم سب کو یقین ہے کہ اس مرتبہ غلطی نہیں کریں گے اور کامیابی حاصل کریں گے۔

میچ کے ٹکٹ مانگنے والوں سے انہوں نے کہا کہ پی سی بی کی جانب سے ہمیں تین سے چار ٹکٹس ملتے ہیں اور امیدوار 200 سے 300 ہوتے ہیں، انہوں نے شائقین سے کہا کہ مہربانی کرکے ناراض نہ ہوا کریں۔فاسٹ باؤلر نے کہا کہ بعض دفعہ اپنی فیملی کو بھی منع کرنا پڑتا ہے،انہوں نے کہاکہ مجبوری ہے اس معاملے میں سب کو خوش نہیں رکھ سکتے بس ٹکٹ نہ مانگا کریں۔