پاک فوج کے میجر کا انسانیت دوست اقدام، زندہ درگور کی گئی بچی کو گود لے کر مثال قائم کردی

نوشہرہ (قدرت روزنامہ) پاک فوج کے آفیسر میجر وقاص نے نوشہرہ میں زندہ دفنائی گئی لاوارث بچی کو گود لے کر انسانیت کی اعلیٰ مثال قائم کردی ہے۔ پاک فوج کے جوان نہ صرف دفاع وطن کے لیے ہمہ وقت تیار رہتے ہیں بلکہ انسانی ہمدردی کے جذبے سے بھی سرشار ہیں۔

آج نیوز کے مطابق 7 فروری 2025 کو نوشہرہ میں ایک افسوسناک واقعہ پیش آیا، جہاں ایک شیر خوار بچی کو زندہ دفن کرنے کی کوشش کی گئی۔ ریسکیو 1122 نے بروقت کارروائی کرتے ہوئے بچی کو بچا کر مقامی ہسپتال منتقل کیا، جہاں اسے طبی امداد فراہم کی گئی۔

بعد ازاں، میجر وقاص نے قانونی کارروائی مکمل کرنے کے بعد سول کورٹ کے ذریعے بچی کو گود لے لیا۔ اس انسان دوست اقدام کو سوشل میڈیا اور مقامی پشتو چینلز پر زبردست پذیرائی ملی، جبکہ عوام نے بھی میجر وقاص کے جذبۂ ہمدردی کو بھرپور سراہا۔

پاک فوج نے ہمیشہ ہر شعبے میں اپنی برتری ثابت کی ہے، اور انسانی ہمدردی کے میدان میں بھی اس کی خدمات اپنی مثال آپ ہیں۔گزشتہ روز ریسکیو اداروں نے نوشہرہ کے قبرستان سے زندہ نومولود بچی دفنانے کی کوشش ناکام بنائی جس کی ویڈیو بھی وائرل ہوئی تھی ۔

ذرائع کے مطابق نومولود بچی کو زندہ دفنانے پر قبرستان میں فاتحہ خوانی کیلئے آئے افراد نے ریسکیو ٹیم کو اطلاع دے دی جس کے بعد ریسکیو 1122 نے فوری کارروائی کرکے بچی کو تحویل میں لے کر ہسپتال منتقل کردیا۔ذرائع نے بتایا کہ نومولود بچی کو کسی نے کپڑے میں لپیٹ کر مٹی میں دبا دیا تھا۔

ویڈیو میں دیکھا جا سکتا ہے کہ ایک شخص جب بچی کے اوپر ڈالا گیا کپڑا اسے مردہ سمجھ کر ہٹاتا ہے تو بچی بازو ذرا سا اٹھاتی ہے۔ریسکو ٹیم کے مطابق کنٹرول روم کو اطلاع ملنے پر فوری طور پر ریسکو 1122 نے بچی کو ہسپتال پہنچایا۔ذرائع کا کہنا تھا کہ نومولود کی ابتدائی طبی امداد اور قانونی کارروائی کے بعد بچی ایک سرکاری اہلکار نے گود لے لی۔

نوشہرہ کے قبرستان سے ملنے والی نومولود بچی کی ویڈیو بھی سوشل میڈیا پر وائرل ہو رہی ہے۔