آن لائن محبت، بھارتی نوجوان نے پاکستان آکر اسلام قبول کیا، بکریاں چرائیں لیکن محبوبہ نے شادی سے انکار کردیا

منڈی بہاءالدین(قدرت روزنامہ)بھارتی ریاست اتر پردیش کے ضلع علی گڑھ سے تعلق رکھنے والا 20 سالہ بادل بابو آن لائن محبت میں گرفتار ہو کر پاکستان آ پہنچا، اسلام قبول کر کے اپنا نام ریحان رکھ لیا لیکن جس لڑکی کے لیے وہ یہ سب کر رہا تھا، اس نے شادی سے انکار کر دیا۔ نتیجتاً نہ صرف اس کا دل ٹوٹا بلکہ وہ قانونی مشکلات میں بھی پھنس گیا۔
ٹائمز آف انڈیا کے مطابق بادل بابو کی دو سال قبل پاکستانی لڑکی ثنا رانی سے سوشل میڈیا پر دوستی ہوئی، جو وقت کے ساتھ گہری محبت میں بدل گئی۔ اپنی محبوبہ کے لیے کچھ بھی کر گزرنے کے جذبے کے تحت اس نے اٹاری واہگہ بارڈر عبور کر کے پاکستان پہنچنے، اسلام قبول کرنے اور شادی کی پیشکش کرنے کا فیصلہ کیا۔
لیکن اس کی امیدوں پر اس وقت پانی پھر گیا جب ثنا رانی نے شادی کی پیشکش مسترد کر دی، جس کے بعد وہ قانونی مسائل میں پھنس گیا۔ ثنا کے علاقے منڈی بہاؤالدین میں چرواہے کی حیثیت سے کام کرنے والے بادل کو 27 دسمبر 2024 کو گرفتار کیا گیا۔ گرفتاری کے وقت اس نے خود کو کراچی کا باشندہ ظاہر کرنے کی کوشش کی لیکن تحقیقات پر حقیقت سامنے آ گئی۔
بادل بابو کے وکیل نے انسانی ہمدردی کی بنیاد پر اس کا کیس لڑنے کا فیصلہ کیا اور عدالت میں مؤقف اختیار کیا کہ ان کا مؤکل بھارت واپس جانے سے خوفزدہ ہے کیونکہ اسے مذہب تبدیل کرنے کی وجہ سے خطرہ لاحق ہو سکتا ہے۔ بادل کے آجر حاجی خان اصغر کے مطابق نوجوان نے پہلے ان سے مزدوری کی درخواست کی تھی بعد میں اس نے اپنی محبت کی کہانی بیان کی۔
اصغر کے مطابق ثنا اور اس کی والدہ نے ابتدائی طور پر بادل کو گھر بلایا تھا، مگر جب انہیں حقیقت معلوم ہوئی تو انہوں نے شادی سے انکار کر دیا، جس کے بعد بادل پاکستان میں بے یار و مددگار رہ گیا۔ حال ہی میں بادل کو اپنے والدین سے رابطے کی اجازت دی گئی، جہاں عدالت کے باہر ہتھکڑیوں میں جکڑا بادل اپنے والدین سے جذباتی گفتگو کرتا نظر آیا۔ اس کے وکیل کا کہنا ہے کہ غیر قانونی سرحدی نقل و حرکت کے معاملے کی تحقیقات جاری ہیں اور اس کی اگلی سماعت اسی ماہ کے آخر میں ہو گی۔