پاکستان نے جنوبی افریقہ کو سنسنی خیز مقابلے کے بعد 6 وکٹوں سے شکست دے دی
کراچی(قدرت روزنامہ) پاکستان نے تین ملکی سیریز کے تیسرے میچ میں جنوبی افریقہ کو چھ وکٹوں سے شکست دے کر ایونٹ میں شاندار واپسی کرلی۔ محمد رضوان اور آغا سلمان کی شاندار سنچریوں نے قومی ٹیم کی جیت میں کلیدی کردار ادا کیا، جبکہ جنوبی افریقہ کا 353 رنز کا بڑا ہدف بھی پاکستان کے مضبوط بیٹنگ لائن اپ کے سامنے کمزور ثابت ہوا۔
کراچی کے نیشنل سٹیڈیم میں کھیلے گئے میچ میں جنوبی افریقہ نے پہلے بیٹنگ کرتے ہوئے 352 رنز بنائے۔ ہینرک کلاسن 87، ٹمبا باووما 82 اور میتھیو بریٹسکے 83 رنز بنا کر نمایاں رہے۔ پاکستان کی جانب سے شاہین شاہ آفریدی نے دو ، جبکہ نسیم شاہ اور خوشدل شاہ نے ایک، ایک کھلاڑی کو آؤٹ کیا۔
جواب میں پاکستان کی بیٹنگ لائن نے شاندار کارکردگی کا مظاہرہ کیا۔ اوپنرز فخر زمان 41 اور بابر اعظم 23 رنز بنا کر جلد آؤٹ ہوگئے، جبکہ سعود شکیل (15) بھی بڑی اننگز نہ کھیل سکے۔ تاہم محمد رضوان اور آغا سلمان نے شاندار شراکت داری قائم کرکے پاکستان کو کامیابی دلائی۔ محمد رضوان نے 122 رنز 128 گیندوں پر 9 چوکوں اور 3 چھکوں کی مدد سے بنائے اور وہ ناٹ آؤٹ رہے۔ آغا سلمان 103 گیندوں پر 134 رنز بنا کر ٹاپ سکورر رہے۔ ان کی اننگز میں 16 چوکے اور دو چھکے شامل تھے۔ دونوں بلے بازوں کے درمیان 251 رنز کی شراکت داری نے پاکستان کی جیت میں مرکزی کردار ادا کیا۔
پاکستان نے 49ویں اوور میں ہدف حاصل کر کے چھ گیندیں قبل ہی کامیابی اپنے نام کر لی۔ یہ جیت پاکستان کے لیے سیریز میں آگے بڑھنے کے لیے انتہائی اہم ہے۔
جنوبی افریقہ کے باؤلرز پاکستانی بلے بازوں کو روکنے میں ناکام رہے۔ ویان ملڈر نے 79 رنز کے عوض 2 وکٹیں حاصل کیں۔ لنگی اینگیڈی اور کوربن بوش 1،1 وکٹ حاصل کر سکے۔ ٹرائی سیریز میں پاکستان کا اگلا مقابلہ 12 فروری 2025 کو ہوگا، جہاں ٹیم مزید کامیابی کے لیے پرعزم ہے۔