عمران خان نے شیر افضل مروت کے حوالے سے کچھ نہیں کہا، شہریار آفریدی کا دعویٰ
بیرسٹر گوہر سے شیر افضل مروت کے حوالے سے کل پوچھا تو انہیں بھی کچھ پتا نہیں تھا، عمران خان سے شیر افضل مروت کے حوالے سے جلد بات کرلی جائے گی؛ پی ٹی آئی رہنماء کی میڈیا سے گفتگو
پشاور(قدرت روزنامہ) پاکستان تحریک انصاف کے رہنما اور سابق وزیر مملکت شہریار آفریدی نے دعویٰ کیا ہے کہ پارٹی قائد عمران خان نے شیر افضل مروت کے حوالے سے کچھ نہیں کہا، انہیں ہٹانے کا علم بیرسٹر گوہر علی کو بھی نہیں، ہم عمران خان سے معلوم کریں گے پھر پتا چل جائے گا۔ پشاور ہائیکورٹ میں میڈیا سے گفتگو کرتے ہوئے کہا کہ بیرسٹر گوہر سے شیر افضل مروت کے حوالے سے کل پوچھا تو انہیں بھی کچھ پتہ نہیں تھا، شیر افضل مروت کی پارٹی کے لیے خدمات ہیں اور پارٹی نے جہاں بلایا وہ وہاں پہنچے، شیرافضل مروت مشکل وقت میں مضبوط کھڑے رہے ہیں، بانی پی ٹی آئی سے ملاقات کر کے شیر افضل مروت کے معاملے کا پتا کریں گے، عمران خان رحمدل انسان ہیں، شیر افضل مروت کے حوالے سے جلد بات کرلی جائے گی، ہم سب پارٹی کے کوڈ آف کنڈکٹ کے پابند ہیں، عمران خان اور ہم سب قانون کی بالا دستی کے لیے کھڑے ہیں۔
پی ٹی آئی رہنماء کا کہنا ہے کہ خیبرپختونخواہ میں ضم کیے گئے اضلاع کے ساتھ ریاست نے وعدے پورے نہیں کیے، کوہاٹ کی 20 ارب روپے سے زائد رائلٹی کو روکا گیا ہے، پنجاب میں پی ٹی آئی ورکرز اور ٹکٹ ہولڈرز سے بدترین سلوک کیا جا رہا ہے، جیلوں میں پی ٹی آئی کے سیاسی قیدیوں سے غیر مناسب سلوک کا سلسلہ جاری ہے، جتنے یہ ظلم کرتے جائیں، عمران خان کے پیرو کاروں میں اضافہ ہو رہا ہے، ہم اور ہمارے بانی چیئرمین عمران خان آئین کی بالا دستی چاہتے ہیں، مذاکرات ایسے معاملات میں نہیں ہوتے جہاں بد ترین فسطایت ہو، بانی نے مذاکرات کے لیے مطالبات پیش کیے جن پر کوئی عمل نہیں ہوا۔
ایک سوال کا جواب دیتے ہوئے سابق وزیر ملکت نے کہا کہ افغانستان ہمارا برادر اسلامی ملک ہے، ایسا وطیرہ اپنانا زیب نہیں دیتا، جو رویہ افغانستان کے ساتھ روا رکھا گیا ہے ، یہ اس لیے بھی درست نہیں ہے کیوں کہ پاکستان میں پلے بڑھے افغانی پاکستان کے وفادار ہیں، وہ پاکستان سے محبت کرتے ہیں۔
