سکوٹیز سکیم کے تحت طلبہ سمیت عام آدمی بھی فائدہ اٹھا سکتا ہے، سرفراز بگٹی

کوئٹہ(قدرت روزنامہ)وزیر اعلی بلوچستان میر سرفراز بگٹی نے کہا ہے کہ بلوچستان کے طلبا، طالبات اور ملازمت پیشہ خواتین کو جدید سفری سہولتیں فراہم کرنے کے لیے سکوٹیز سکیم متعارف کرائی جا رہی ہے جس کے تحت طالبات کو پنک سکوٹیز اور طلبا کو الیکٹرانک بائیکس فراہم کیے جائیں گے، اس سکیم سے عام آدمی بھی فائدہ اٹھا سکتا ہے جس کے لئے ضوابط و طریقہ کار طے کیا جاررہا ہے ،سکیم کا مقصد نوجوانوں اور خواتین کو بااختیار بنانا اور ان کے سفری مسائل کو حل کرنا ہے ان خیالات کا اظہار انہوں نے یہاں چیف منسٹر سیکرٹریٹ میں اعلی سطحی اجلاس کی صدارت کرتے ہوئے کیا جس میں سکیم کے مختلف پہلوں کا جائزہ لیا گیا ۔اجلاس میں فیصلہ کیا گیا کہ اس سکیم کو موثر اور شفاف بنانے کے لیے سیکرٹری فنانس بلوچستان کی سربراہی میں خصوصی کمیٹی قائم کی جائے گی جو سکوٹیز اور بائیکس کی فراہمی کے لیے ضابطہ کار طے کرے گی ۔وزیر اعلی نے کہا کہ سکیم کے تحت سبسڈی پر سکوٹیز فراہم کی جائیں گی تاکہ طلبا، طالبات اور ملازمت پیشہ خواتین کو آمد و رفت میں سہولت حاصل ہو ،سٹیٹ بینک کی مشاورت و معاونت سے بینک فنانسنگ کی سہولت بھی فراہم کی جائے گی تاکہ اس سکیم کو قابل عمل اور پائیدار بنایا جا سکے ۔انہوں نے ہدایت کی کہ یہ سکیم صرف طلبا و طالبات تک محدود نہ ہو بلکہ آسان شرائط پر عام آدمی کے لیے بھی اوپن کی جائے تاکہ صوبے کے زیادہ سے زیادہ لوگ اس جدید سفری سہولت سے مستفید ہو سکیں ۔وزیر اعلی نے عالمی یوم خواتین کے موقع پر پنک سکوٹیز سکیم کے باضابطہ آغاز کی منظوری دیتے ہوئے کہا کہ صوبے کی خواتین کو خود مختار اور بااختیار دیکھنا چاہتے ہیں اور یہ اقدام ان کی آزادی و خودمختاری کی سمت ایک مثبت پیش رفت ہے ۔اجلاس میں شریک حکام نے وزیر اعلی کے اس اقدام کو سراہا اور اس عزم کا اظہار کیا کہ اس سکیم کو جلد از جلد عملی شکل دی جائے گی تاکہ بلوچستان کے نوجوانوں اور خواتین کو بہتر سفری سہولت میسر آسکے۔