پہلے ہی کہا تھا رواں سال پی ٹی آئی میں اختلافات بڑھیں گے: منظور وسان

رانی پور( قدرت روزنامہ ) پیپلز پارٹی کے سینئر رہنما منظور وسان نے کہا ہے کہ پہلے ہی کہا تھا رواں سال پی ٹی آئی میں اختلافات بڑھ جائیں گے۔
نجی ٹی وی دنیا نیوز کے مطابق کوٹ ڈیجی میں میڈیا سے گفتگو کرتے ہوئے منظور وسان کا کہنا تھا کہ پی ٹی آئی رہنما ایک دوسرے کو تھپڑ مار رہے ہیں، اس سے بھی زیادہ ان کے اختلافات بڑھیں گے، بانی پی ٹی آئی کی رہائی کے امکانات نہیں ہوں گے تو یہ آپس میں لڑیں گے۔
انہوں نے کہا کہ میں نے پہلے کہا تھا کہ 2025 میں پی ٹی آئی میں اختلافات بڑھ جائیں گے،انٹرنیشنل قوتوں کا جس طرح انتظار کیا جارہا تھا اب ان کی طرف سے رسپانس نہیں آرہا، بھٹو صاحب کی شہادت کے بعد ہماری پارٹی کو بھی توڑنے کی کوشش کی گئی لیکن الحمدللہ اس کے بعد بھی پیپلزپارٹی کمزور نہ ہوئی۔
سینئررہنما پیپلزپارٹی کا کہنا تھا کہ پی ٹی آئی کی سیاسی جڑیں اب پیپلزپارٹی جیسی نہیں رہیں، پی ٹی آئی میں شامل ہونے والے اچانک آئے اور اچانک چلے جائیں گے، بانی پی ٹی آئی سے بہت غلطیاں ہوئی ہیں، مزید غلطیاں نہ کریں تو بہتر ہے۔
منظور وسان نے کہا کہ پیپلز پارٹی نے ہمیشہ صحافیوں کے حق میں بات کی ہے پیکا ایکٹ پر باتیں ہونی چاہئیں، ملک ترقی کی راہ پر گامزن ہے فنڈر ملتے ہیں تو انہیں واپس بھی کرتے ہیں، آئی ایم ایف کی کچھ شرائط عوام کی فیور میں نہیں جیسے زراعت پر ٹیکس۔