صوبوں میں لڑائی اور وفاق میں بھائی بھائی! ن لیگ اور پی پی کی کھلی منافقت کا ثبوت ہے، بیرسٹر سیف

پشاور(قدرت روزنامہ)خیبرپختونخوا کے مشیر اطلاعات بیرسٹر ڈاکٹر محمد علی سیف نے کہا ہے کہ سندھ اور پنجاب کے وزرا میں لڑائی جبکہ وفاق میں بھائی بھائی ہونا ن لیگ اور پیپلز پارٹی کی کھلی منافقت کا ثبوت ہے۔
انہوں نے مزید کہا کہ دونوں جماعتیں “وچوں وچ کھائی جا، اتوں رولا پائی جا” کی عملی تصویر بن چکی ہیں۔
مشیر اطلاعات نے حکومت کے اتحادیوں پر تنقید کرتے ہوئے کہا کہ اتحادی جماعتیں صرف لوٹ کے مال کی تقسیم پر لڑ رہی ہیں۔
انہوں نے کہا کہ رمضان سے قبل حکمرانوں نے اپنی فیکٹریوں کی چینی مہنگی کر دی ہے، جس سے عوام پر مزید بوجھ پڑ گیا ہے۔
ڈاکٹر محمد علی سیف نے معاشی صورتحال پر تشویش کا اظہار کرتے ہوئے کہا کہ گزشتہ ایک سال میں پاکستان پر قرضے اور واجبات میں 6 ہزار 106 ارب روپے کا اضافہ ہوا، جو ن لیگ اور پیپلز پارٹی حکومت کا لایا ہوا عذاب ہے۔
انہوں نے کہا کہ پاکستان پر قرضوں کا حجم 88 ہزار ارب روپے تک پہنچ چکا ہے جو معیشت کی تباہی کی گواہی دیتا ہے۔
مشیر اطلاعات کا کہنا تھا کہ ن لیگ اور پیپلز پارٹی کی نمائشی لڑائی کے نتیجے میں عوام مہنگائی کی چکی میں پس رہے ہیں اور ملک قرض کی دلدل میں دھنس چکا ہے۔ انہوں نے مزید کہا کہ حکومت کی واحد کامیابی صرف ملک پر قرضوں میں اضافہ کرنا ہے۔