ماضی میں ن لیگ سمیت کسی میں یہ جرأت نہیں تھی کہ ملک ریاض کیخلاف ریفرنس دائر کرسکے، رانا ثنا اللہ

اسلام آباد (قدرت روزنامہ)وزیراعظم پاکستان کے مشیر برائے سیاسی امور رانا ثنااللہ نے کہا ہے کہ ملک ریاض کے خلاف نیب نے ریفرنس دائر کرنے کی ہمت کی ہے تو اسے سراہنا چاہیے، کیونکہ ماضی میں میری حکومت سمیت کسی کو ملک ریاض کے خلاف کارروائی کی جرات نہیں ہوئی۔
نجی ٹی وی سے گفتگو کرتے ہوئے انہوں نے کہاکہ یہ پہلا موقع ہے کہ ملک ریاض کے خلاف ریفرنسز دائر ہوئے ہیں، ورنہ اس سے قبل ریفرنس تو کیا ان کے خلاف کبھی درخواست بھی دائر نہیں ہوئی۔
رانا ثنااللہ نے کہاکہ عارف علوی صدر بننے سے پہلے جیسے تھے صدر بننے کے بعد بھی ویسے ہی ہیں، انہیں ریاست کے خلاف بات نہیں کرنی چاہیے۔
انہوں نے کہاکہ حکومت کو عارف علوی کی مراعات واپس لینی چاہییں، اور حکومت ایسا کرسکتی ہے۔
رانا ثنااللہ نے کہاکہ جمہوریت ڈائیلاگ سے چلتی ہے ڈیڈلاک سے نہیں، پی ٹی آئی نے سسٹم کو قبول کرلیا ہے تو مصنوعی بحران پیدا نہیں کرنا چاہیے۔
انہوں نے کہاکہ میں یہ نہیں کہتا کہ وہ دھاندلی کے حوالے سے بات نہ کریں، اگر ان کو شکایات ہیں تو سسٹم کے ذریعے اپنا کیس دائر کریں۔
مشیر وزیراعظم نے کہاکہ ہم بھی یہ سمجھتے ہیں کہ 2018 میں نواز شریف کا راستہ روکنے کے لیے آر ٹی ایس بٹھا کر عمران خان کو مسلط کیا گیا۔
انہوں نے کہاکہ اگر سیاستدان اپنے مسائل حل کرنے کے لیے کسی نتیجے پر نہیں پہنچیں گے تو سسٹم ایسے ہی چلتا رہے گا، اگر سیاستدان ساتھ بیٹھیں گے تو مسائل کا حل نکل آئےگا۔
ایک سوال کے جواب میں انہوں نے کہاکہ مولانا فضل الرحمان انتخابات میں دھاندلی کا کہہ رہے ہیں تو سوال یہ ہے کہ کیا ان کے ساتھ دھاندلی پنجاب میں ہوئی ہے۔