راکھی ساونت نے پاکستانیوں سمیت 20 افراد کو عمرہ پر بھجوا دیا

اسلام آباد (قدرت روزنامہ)بالی ووڈ کی معروف اداکارہ راکھی ساونت نے رمضان سے قبل 20 افراد کو عمرے پر بھجوا دیا جس کی ویڈیو بھی انہوں نے جاری کی ہے۔
راکھی ساونت نے اپنے ویڈیو بیان میں بتایا کہ وہ اللہ کی راہ میں رمضان المبارک سے قبل ایک چھوٹا سا نیک کام کر رہی ہیں۔ 10 پاکستانی اور 10 بھارتی بہن بھائیوں کو عمرے پر بھیج رہی ہیں۔
انہوں نے بتایا کہ وہ اس وقت دبئی میں موجود ہیں اور جن مرد حضرات کو عمرے پر بھیج رہی ہیں انہیں احرام بھی دیں گی، راکھی نے بتایا کہ وہ پہلی بار ایسا کوئی کام کرنے جا رہی ہیں اس لیے نروس ہوں۔ ساتھ ہی انہوں نے دعا کی کہ اللہ ان کے نیک کام کو قبول کرے۔
راکھی ساونت کا کہنا تھا کہ وہ 3 بار عمرہ کر کے آئی ہیں تو انہوں نے اللہ سے کہا تھا کہ انہیں کوئی ذمہ داری دیں۔ یہ ذمہ داری انہیں اللہ نے دی ہے، اور ان کی جتنی بھی کمائی ہے وہ اس کام پر لگا رہی ہیں۔ راکھی کا کہنا تھا کہ انہیں لگتا ہے کہ اب وہ ٹھیک طریقے سے زندگی جی رہی ہیں۔
ان کا مزید کہنا تھا کہ انہوں نے اللہ سے کہا تھا کہ وہ اپنے دین، قبر اور زندگی کے لیے کچھ کر سکیں۔ راکھی نے کہا کہ وہ دعا کرتی ہیں کہ ہندوستان اور پاکستان ایک ہو جائیں۔
اس دوران راکھی ساونت نے عمرہ زائرین میں کھانا اور احرام تقسیم کیے اور دبئی سے سعودی عرب روانہ کیا۔
واضح رہے کہ راکھی ساونت مشہور بھارتی اداکارہ اور رقاصہ ہیں۔ انہوں نے دائرہ اسلام میں داخل ہونے کے بعد ایک ہندوستانی مسلمان عادل درانی سے شادی کی تھی اور اپنا نام بدل کر فاطمہ رکھ لیا تھا۔ بدقسمتی سے ان کی شادی کامیاب نہیں ہوئی، انہوں نے گزشتہ سال اپنے شوہر سے علیحدگی کے بعد عمرہ ادا کیا۔
راکھی ساونت نے نئے سال کے آغاز پر عمرہ ادا کرتے ہوئے ایک ویڈیو جاری کی تھی۔ اپنی ویڈیو میں راکھی نے کہا دنیا نیا سال منا رہی ہے اور وہ یہاں زیارت کر رہی ہیں۔ ان کا نیا سال عمرہ سے شروع ہوا ہے۔ راکھی ساونت کا کہنا تھا کہ انہیں لگتا ہے کہ 2025 ان کی زندگی کا بہترین سال ہو گا۔ کیونکہ انہوں نے اس سال کی شروعات عمرے سے کی ہے۔