الزامات وہ لگاتے ہیں جن کی تربیت نہیں ہوتی، مریم نواز کی عوامی خدمات کا مقابلہ کریں: عظمیٰ بخاری

لاہور ( قدرت روزنامہ )وزیراطلاعات پنجاب عظمیٰ بخاری نے کہا ہے کہ گھٹیا باتیں اور الزامات وہ لگاتے ہیں جن کی تربیت نہیں ہوتی، مریم نواز کی عوامی خدمات کا مقابلہ کریں۔ بعض لوگ سازشیں کرکے ملک کو نقصان پہنچانے کی کوششیں کرتے رہے۔

انہوں نے ان خیالات کا اظہار لاہور میں صوبائی وزیر بلدیات ذیشان رفیق کے ساتھ مشترکہ پریس کانفرنس میں کیا ۔ وزیر اطلاعات پنجاب عظمیٰ بخاری نے کہا کہ فروری کا مہینہ مل کی تاریخ میں اہمیت کا حامل ہے۔ 8 فروری کے الیکشن کے وقت قوم ڈیفالٹ کے دہانے پر تھی۔ بعض لوگ سازشیں کرکے ملک کو نقصان پہنچاتے رہے۔ مریم نواز نے 26 فروری کو وزیراعلیٰ پنجاب کے عہدے کا حلف لیا۔ مریم نواز کی پنجاب حکومت نے ایک سال میں مفروضوں کو غلط ثابت کیا اور کامیابیوں کے جھنڈے گاڑے۔ نارووال میں سڑکوں کا افتتاح جلسے کی شکل اختیار کرگیا۔

“ایکسپریس نیوز ” کے مطابق عظمیٰ بخاری نے کہا کہ یہ ان تجزیہ کاروں اور نام نہاد صحافیوں کےلئے سبق ہے جو کہتے تھے(ن )لیگ ختم ہو گئی۔ عوام کو گالی گلوچ اور وفاق پرحملہ کرنا پسند نہیں۔ خدمت کا مقابلہ کریں دلیل ختم ہوجاتی ہے تو آواز اونچی ہو جاتی ہے۔ گھٹیا باتیں اور الزامات وہ لگاتے ہیں جن کی تربیت نہیں ہوتی۔ مریم نواز کی عوامی خدمات کا مقابلہ کریں۔ آپ نے اپنے صوبے کو کیا دیا۔ کارکردگی اور خدمت( ن )لیگ کا طرۂ امتیاز ہے۔ اگلا سال اس سے بھی بہترین ہوگا۔