اوورسیز پاکستانیوں نے بانی کی کال مسترد کر دی، ریکارڈ ترسیلات زر بھجوائیں: امیر مقام
صوابی ( قدرت روزنامہ ) وفاقی وزیر انجینئر امیرمقام نے کہا ہے کہ بیرون ملک مقیم پاکستانیوں نے بانی کی کال کو مسترد کر دیا، اوورسیز پاکستانیوں نے ریکارڈ ترسیلات زر بھجوائیں۔
نجی ٹی وی دنیا نیوز کے مطابق جلسے سے خطاب کرتے ہوئے وفاقی وزیر انجینئر امیرمقام نے کہا کہ عوام نے پی ٹی آئی کی انتشار کی سیاست کو مسترد کر دیا، بانی پی ٹی آئی نے گالم گلوچ کے کلچر کو پروان چڑھایا، عوام مسلم لیگ (ن) کی قیادت سے بہت محبت کرتے ہیں۔
امیر مقام نے کہا کہ ہم باتوں پر نہیں عملی اقدامات پر یقین رکھتے ہیں، ہماری قیادت نے ہمیں عوام کی خدمت کرنا سکھایا ہے، عوام کی خدمت کا بھرپور جذبہ رکھتے ہیں۔
انہوں نے کہا کہ چھوٹا لاہور کے عوام کے تمام مسائل حل کریں گے، خیبرپختونخوا کی حکومت نے عوام کے مسائل حل نہیں کئے۔
امیر مقام نے کہا کہ مسلم لیگ (ن) تعمیر و ترقی کا دوسرا نام ہے، وزیراعظم شہباز شریف نے ملک کو ڈیفالٹ سے بچایا، حکومتی اقدامات کی بدولت مہنگائی میں نمایاں کمی ہوئی ہے۔