وفاقی وزیر امور کشمیر انجینئر امیر مقام نے علی امین گنڈا پورکا مناظرے کا چیلنج قبول کرلیا

اسلام آباد ( قدرت روزنامہ ) وفاقی وزیر امور کشمیر اور پاکستان مسلم لیگ (ن) خیبرپختونخوا کے صدر انجینئر امیر مقام نے وزیراعلیٰ علی امین گنڈا پور کا وزیراعلیٰ پنجاب کو مناظرے کا چیلنج قبول کرلیا ۔
تفصیلات کے مطابق انجینئر امیر مقام نے کہا ہے کہ علی امین گنڈا پور کسی بھی ٹی وی چینل پر آئیں اور مجھ سے مناظرہ کریں، ہم تیار ہیں ،علی امین کو چیلنج ہے کہ وہ خیبرپختون خوا اسمبلی میں آئیں اور اپنی کارکردگی پر اپوزیشن لیڈر سے لائیو مناظرہ کریں ۔وزیراعلی خیبرپختون خوا وقت اور تاریخ بتائیں تاکہ عوام کے سامنے سچ اور جھوٹ واضح ہوجائے ۔

وفاقی وزیر امور کشمیر انجینئر امیر مقام نے کہا کہ ہم بتائیں گے کہ مریم نواز نے ایک سال میں پنجاب میں کیا کیا ، پی ٹی آئی خیبرپختون خوا میں اپنی 13 سال کی کارکردگی بتائے ۔علی امین گنڈا پورا بتائے کہ اُن کے لیڈرکے اعلان کردہ ساڑھے تین سو ڈیمز 11 سال میں کیوں نہیں بن سکے؟ علی امین گنڈا پور بتائے کہ خیبرپختون خوا کے کرپشن میں ملوث وزراء کے خلاف اب تک کیا کارروائی ہوئی؟ کتنوں کو سزا ملی ؟

وفاقی وزیر امور کشمیر کا مزید کہنا تھا کہ 9 مئی کو ریاست ، فوجی تنصیبات اور شہداء کی یادگاروں پر حملے کرانے والے ماسٹر مائنڈ کے نام پر ارباب نیاز کرکٹ سٹیڈیم پشاور کا نام نہیں رکھنے دیں گے ۔پاکستان کو ڈیفالٹ کرانے اور آئی ایم ایف کو معاشی مدد سے روکنے کے لئے خط لکھنے والے کے نام پر سٹیڈیم کا نام نہیں رکھنے دیں گے ۔کرکٹ میں جواء کھیلنے والے سالے کو جتوانے کے لیے ٹپس دینے والے کے نام پر کرکٹ سٹیڈیم کا نام نہیں رکھنے دیں گے ۔اسرائیل اور بھارت سے فارن فنڈنگ لینے اور پاکستان کے خلاف بیرونی ممالک سے قراردادیں منظور کرانے والے کے نام پر سٹیڈیم کا نام نہیں رکھنے دیں گے ۔190 ملین پاﺅنڈ قوم کا چوری کرنے والے کے نام پر سٹیڈیم کا نام نہیں رکھنے دیں گے۔دہشت گردی اور دہشت گردوں کو واپس لانے اور یہاں بسانے والے کے نام پر سٹیڈیم کا نام نہیں رکھنے دیں گے۔