تاریخی مقامات کی3 فیز میں بحالی,شاندار پنجاب میگا ٹورسٹ منصوبے کا آغاز،پوری دنیا کو پنجاب کا مہمان بنائیں گے: وزیراعلیٰ مریم نواز
لاہور( قدرت روزنامہ ) وزیراعلیٰ پنجاب مریم نواز نے میگنی فیشنٹ پنجاب (شاندار پنجاب) میگا ٹورسٹ منصوبے کا آغاز کر دیا ہے جس کے تحت پنجاب کو تہذیب و سیاحت کا ریجنل اور انٹرنیشنل مرکز بنایا جائے گا۔ پنجاب کے 170 تاریخی مقامات کو عالمی معیار کے سیاحتی مراکزمیں تبدیل کرنے کیلئے تمام تاریخی مقامات کی میپنگ مکمل کرلی گئی۔ فہرست میں 101 گردوارے اور 53 گرجا گھر بھی شامل ہیں۔ سینئرصوبائی وزیر مریم اورنگزیب کی قیادت میں5 ماہ کی محنت سے وزیراعلی کے وژن کو عملی شکل دی گئی۔ سینئر منسٹر مریم اورنگزیب کے تمام مجوزہ منصوبوں کی منظوری دی گئی ہے۔ پنجاب ٹورازم اینڈ ہیریٹیج اتھارٹی قائم کرنے کے فیصلے کی باضابطہ منظوری کے لiے سمری کابینہ کو بھجوا دی گئی ہے۔ تاریخ، ورثہ اور سیاحت سے متعلق تمام ادارے اتھارٹی کے ماتحت ہوں گے۔ منصوبے کی کامیابی یقینی بنانے کے لئے پہلی بار پنجاب ٹورازم اینڈ ہیریٹیج اتھارٹی ایکٹ 2024 بھی لاگو کر دیا گیا ہے۔ پنجاب کی پہلی جامع ٹورسٹ پالیسی بھی تیار کر لی گئی۔
وزیراعلیٰ مریم نواز نے پنجاب کے تاریخی مقامات کی 3 مراحل میں بحالی کا منصوبہ سالانہ ترقیاتی پروگرام میں شامل کیا اور جولائی تک ٹینڈرنگ شروع کرنے کی ہدایت کی ہے۔ پہلا مرحلہ جون میں جبکہ دیگر تاریخی مقامات کی بحالی دوسرے اور تیسرے مرحلے میں مکمل ہوگی۔ وزیراعلیٰ نے 16 سیاحتی منصوبوں کے پی سی وَن کی فوری تیاری اور مری کی بانسرا گلی میں ٹورسٹ ویلیج اور پارکس تعمیر کرنے کی ہدایت کی۔
وزیراعلیٰ مریم نواز نے تاریخی شہر ٹیکسلا کو انٹرنیشنل ”ٹورسٹ سٹی“ بنانے کا اعلان کیا اور سوئٹزرلینڈ کی طرز پر چھانگا مانگاکو جدید تفریح گاہ بنانے کی منظوری دیدی۔ ٹیکسلا میوزیم کی اپ گریڈیشن، جدیدٹیکنالوجی سے ڈسپلے سینٹرزبنانے کا بھی فیصلہ کیا گیا۔ ٹیکسلا میں بودھ مت کے پیروکاروں کی سہولت کے لئے عبادت گاہیں اور سدھارتا کے نام سے نئی گیلریزبھی تعمیر کی جائے گی۔ سکھ برادری کی سہولت کے لئے 46 غیرفعال گردوارے بحال کرنے کی بھی منظوری دے دی گئی۔
وزیراعلیٰ مریم نواز نے اقلیتی برادری کے مذہبی و تاریخی مقامات کی حفاظت کا جامع نظام بنانے کی ہدایت کی۔ سیاحت کے فروغ کے لئے بہترین سڑکیں تعمیر، انفراسٹرکچر کی مکمل اپ گریڈیشن اور عالمی معیار کی جدید سہولیات فراہم کی جائیں گی۔ ”دلکش لاہور“ منصوبے کے لئے 400 ملین روپے جاری کر دیئے گئے ہیں۔
وزیراعلیٰ مریم نواز نے مال روڈ کی تاریخ محفوظ اور فوری مکمل کرنے کی ہدایت کی۔ پہلی بار پورے پنجاب کو تاریخی اور سیاحتی مقامات کے لحاظ سے 9 حصوں میں تقسیم کیا گیا ہے۔ پنجاب ”سیاحتی ٹریلز“ کے نام سے کی گئی تقسیم کے عنوان بابا گرو نانک دیو جی، کلچرل ڈسٹرکٹ مال روڈ لاہور، والڈ سٹی لاہور، گوجرانوالہ، ایمن آباد اور لاہور میں سکھ مذہب کے تاریخی مقامات، جی ٹی روڈ پر مغل دور کی یادگاریں، سالٹ رینج، بھاٹی گیٹ، ٹیکسالی گیٹ رکھے گئے ہیں۔ ”سیاحتی ٹریلز“ پر سفاری ٹرین چلے گی، ٹرانسپورٹ کی سہولیات اور نجی شعبے کو شامل کرکے آنے والے سیاحوں کو خصوصی ڈسکاؤنٹ بھی دیا جائے گا۔ 17 ویں صدی کے قدیم تاریخی ہرن مینار کی اپ گریڈیشن کا سروے مکمل کرلی گئی اور نیلا گنبد کی توسیع کابھی فیصلہ کیا گیا ہے۔ 131 سال قدیم لاہور میوزیم کو جدید عجائب گھر بنانے کے لئے 240 ملین روپے کی منظوری دی گئی۔ یونیسکو کے تعاون سے پنجاب کی ایک ہزار سالہ تاریخ کومحفوظ کیا جارہا ہے جس سے پنجاب کی ثقافت، تاریخ اور روایات کو فروغ ملے گا۔ ڈیجیٹل ٹیکنالوجی کے ذریعے پنجاب کی تاریخ وتہذیب، لوک کہانیاں، موسیقی، ہیروز، فن وثقافت، صوفیاء اوراُن کے کلام سمیت دیگر معلومات کو کہانیوں کی شکل میں سیاح سُن اور دیکھ سکیں گے۔ تاریخی قلعہ کہنہ قاسم باغ کی بحالی کے لئے ٹینڈر مکمل ہونے پر فنڈز جاری کر دیئے گئے۔
وزیراعلیٰ مریم نواز نے اُچ شریف میں زائرین کے لئے پیدل راستہ بنانے اور سہولیات کی فراہمی کی ہدایت کی۔ سیاحوں کی سہولت کے لئے ڈیجیٹل ایپ بھی تیار کی گئی ہے جس سے سیرو سیاحت کی تمام معلومات، راہنمائی اور خدمات موبائل فون پر دستیاب ہوں گی۔
وزیراعلیٰ مریم نواز نے کہا کہ پنجاب میں ٹورازم کی بحالی کے اس پروگرام کے ذریعے پنجاب کو بہترین ٹورازم ڈیسٹی نیشن بنائیں گے۔پنجاب کو ٹورازم کا ہب بنا کر پوری دنیا کواس کا مہمان بنائیں گے اورپانچ دریاؤں کی دھرتی کے تہذیبی رنگ دکھائیں گے۔ پنجاب میں کئی مذاہب، زمانوں اور ثقافتوں کے دریابہتے آئے ہیں۔ہماری تاریخ، ثقافت اور ورثہ کی حفاظت آنے والی نسلوں کی امانت ہے۔برصغیر میں اناج کا گھر کہلا نے والا پنجاب، دیگر مذاہب کے ماننے والوں کی روحانی تسکین کا گہوارہ بھی ہے۔ سیاحت کے فروغ سے معاشی ترقی میں مدد ملے گی، پنجاب اور پاکستان کا عالمی امیج دنیا میں نئی شان سے چمکے گا۔ اپنی تاریخ، تہذیب وثقافت، ہیروز اور روایات بھلانے والی قومیں مٹ جاتی ہیں، پنجاب کا تاریخی ورثہ اور ثقافت دنیا کے سامنے لا رہے ہیں۔
وزیراعلیٰ مریم نواز نے کہا کہ سینئر منسٹر مریم اورنگزیب سمیت اس کاوش میں شریک ٹیم کے ہر فرد اور ادارے کو شاباش دیتی ہوں۔مجھے پورا یقین ہے کہ جتنی محنت، لگن، جذبے اور تیزی سے یہ میگا پلان مرتب ہوا، اس سے بھی زیادہ تیزی، جذبے اور قابلیت سے آپ ان منصوبوں کو مکمل کریں گے۔