واٹس ایپ نے ایک ماہ کے دوران 84 لاکھ بھارتی اکاونٹس بند کردیے ، وجہ کیا ہے؟
نئی دہلی (قدرت روزنامہ )پیغام رسانی کے سب سے بڑے سوشل میڈیا پلیٹ فارم واٹس ایپ نے بھارت میں ایک ماہ کے دوران 8.4 ملین (84 لاکھ ) سے زائد واٹس ایپ اکاونٹس بند کردیے۔
نجی ٹی وی جیونیوز نے میڈیا رپورٹس کے حوالے سے بتایا کہ یہ کارروائی واٹس ایپ کی پیرنٹ کمپنی میٹا کی طرف سے جعلی سرگرمیوں کے پیش نظر پلیٹ فارم کے غلط استعمال پر بڑھتے ہوئے خدشات کے جواب میں سامنے آئی ہے۔میڈیا رپورٹس میں بتایا گیا ہے کہ اگست 2024 میں واٹس ایپ کو 10707 صارفین کی جانب سے شکایات موصول ہوئیں جس میں سے 93 فیصد شکایات پر پلیٹ فارم کی جانب سے فوری کارروائی کی گئی۔
میٹا نے انفارمیشن ٹیکنالوجی ایکٹ کے تحت بھارت میں تقریباً 8.45 ملین واٹس ایپ اکاونٹس بند کردیے۔رپورٹ میں انکشاف کیا گیا ہے کہ یہ اکاونٹس یکم اگست سے 31 اگست کے درمیان بند کئے گئے۔
دوسری جانب واٹس ایپ نے بتایا کہ پابندی صارفین کی جانب سے فراڈ اور مشکوک سرگرمیوں کی اطلاعات ملنے پر عمل میں لائی گئی جبکہ پابندی کا مقصد پلیٹ فارم کی سالمیت کے تحفظ کو مستحکم بنانا ہے۔
اس پابندی کے تحت مجموعی طور پر بلاک کئے گئے اکاونٹس میں سے 1.66 ملین صارفین کو سنگین خلاف ورزیوں کی وجہ سے فوری طور پر بلاک کردیا گیا تھاجبکہ باقی اکاونٹس کو تحقیقات کے بعد مشکوک قرار دینے پر بلاک کیا گیا۔