چیمپؕنز ٹرافی، دولہا اپنی بارات چھوڑ کر کرکٹ میچ دیکھنے قذافی سٹیڈیم میں پہنچ گیا

لاہور(قدرت روزنامہ) ضلع جھنگ سے تعلق رکھنے والے دولہا اپنی بارات چھوڑ کر چیمپئنز ٹرافی 2025 کا آسٹریلیا اور انگلینڈ کا میچ دیکھنے قذافی سٹیڈیم پہنچ گیا۔

دولہے کے اس انوکھے عمل نے سٹیڈیم میں موجود شائقین کرکٹ کو حیران کن حد تک محظوظ کر دیا۔جب صحافی نے دولہا سے اس کے اس غیر متوقع فیصلے کے بارے میں سوال کیا تو اس کا جواب تھا کہ اتنے سالوں بعد انٹرنیشنل کرکٹ پاکستان میں آئی ہے، کرکٹ پہلے اور شادی بعد میں ہے۔دولہا نے مزید کہا کہ اگر دلہن ناراض ہوتی ہے تو ہوتی رہے، مگر ایک انٹرنیشنل ٹیم کو خوش آمدید کہنا زیادہ ضروری ہے۔

اس جواب نے نہ صرف سٹیڈیم میں موجود لوگوں کو ہنسا دیا بلکہ یہ واقعہ سوشل میڈیا پر بھی وائرل ہوگیا۔ کرکٹ کے شائقین نے اس دولہے کی کرکٹ سے محبت اور جذبے کی تعریف کی اور کہا کہ اس کی کرکٹ کیلئے محبت واقعی قابلِ ستائش ہے۔

خیال رہے کہ چیمپئنز ٹرافی 2025 کا چوتھا میچ انگلینڈ اور آسٹریلیا کے درمیان ہو نا تھا ، جس میں دونوں ٹیمیں جیت کیلئے پوری شدت سے میدان میں ہیں۔ قذافی اسٹیڈیم میں شائقین کا جوش و خروش عروج پر ہے اور یہ واقعہ اس میچ کی یادگار لمحوں میں شامل ہو چکا ہے۔دولہے کا یہ دلچسپ کارنامہ کرکٹ کی محبت اور جذبے کی ایک شاندار مثال بن گیا ۔