سزائے موت کے مجرم کے اعزاز میں دعوت پر پولیس اہلکاروں کیخلاف مقدمہ درج

اسلام آباد (قدرت روزنامہ)سروسز اسپتال لاہور میں سزائے موت کے قیدی کے لیے خصوصی دعوت کے اہتمام کا انکشاف ہوا ہے، جس پر پولیس اہلکاروں کے خلاف مقدمہ درج کرلیا گیا۔
لاہور کے سروسز اسپتال میں پولیس اہلکاروں کی جانب سے سزائے موت کے قیدی کے لیے خصوصی دعوت کا اہتمام ہونے کے انکشاف پر ہونے والی انکوائری کے بعد اہلکاروں کے خلاف تھانہ شادمان میں مقدمہ درج کیا گیا۔
متعلقہ پولیس اہلکاروں کیخلاف درج ایف آئی آر کے مطابق اہلکاروں نے قیدی کی اہلخانہ سے غیر قانونی طور پر ملاقات کروائی اور کھانے کا انتظام کیا۔
ایف آئی آر کے مطابق ملزمان نے قیدی کے گرد ہجوم اکٹھا کیا اور تفریح کا بندوست کیا۔ خطرناک ملزم اس دوران فرار ہوسکتا تھا۔
انکوائری کے بعد 2 اہلکاروں شفاقت اور امداد کے خلاف مقدمہ درج کیا گیا ہے۔ مقدمہ جوڈیشل ونگ کے سب انسپکٹر کے بیان پر درج کیا گیا۔
واضح رہے کہ قتل کے مقدمہ کے قیدی کو علاج کے لیے سروسز اسپتال لایا گیا تھا۔