چیمپیئنز ٹرافی: کیا 2 میچ ہارنے کے بعد اب بھی پاکستان اگلے راؤنڈ تک جا سکتا ہے؟

اسلام آباد (قدرت روزنامہ)چیمپیئنز ٹرافی کے دو گروپ میچ ہارنے کے بعد پاکستان کا ٹورنامنٹ کے اگلے راؤنڈ میں جانے کا سفر مشکل ہوگیا تاہم اب بھی ممکن ہے کہ پاکستان ایونٹ میں اپنا سفر جاری رکھ سکتا ہے۔
پاکستان کو نیوزی لینڈ اور بھارت سے پے درپے شکستوں کے بعد اب بات اگر مگر پر آکر اٹک گئی ہے، جس کے لیے پاکستان کے ہاتھ میں کچھ بھی نہیں۔
اب پاکستان کو باقی میچز کے نتائج پر انحصار کرنا پڑےگا، جس کے بعد واضح ہوگا کہ قومی ٹیم چیمپیئنز ٹرافی کے اگلے راؤنڈ میں جا سکے گی یا نہیں۔
قومی ٹیم کو اگلے راؤنڈ تک رسائی کے لیے 27 فروری کو بنگلہ دیش کے خلاف راولپنڈی میں ہونے والا میچ بھاری مارجن سے جیتنا ہوگا۔ اس کے ساتھ ساتھ یہ بھی ضروری ہے کہ نیوزی لینڈ اپنے دونوں میچ بھاری مارجن سے ہار جائے۔
کل راولپنڈی اسٹیڈیم میں بنگلہ دیش اور نیوزی لینڈ کے درمیان ہونے والا مقابلہ انتہائی اہم ہوگا، اگر نیوزی لینڈ میچ جیت جاتا ہے یا بارش کی وجہ سے میچ متاثر ہو جاتا ہے تو پاکستانی ٹیم ٹورنامنٹ سے باہر ہو جائےگی۔
اس کے بعد پاکستان اور بنگلہ دیش کے درمیان میچ 27 فروری کو راولپنڈی کرکٹ اسٹیڈیم میں شیڈول ہے، جبکہ بھارت اور نیوزی لینڈ کی ٹیمیں 2 مارچ کو آمنے سامنے ہوں گی۔
اگر مگر کے امکان کے بعد اب پاکستانی شائقین کرکٹ کی نظریں کل کے نیوزی لینڈ اور بنگلہ دیش کے میچ پر لگ گئی ہیں جو پاکستانی ٹیم کی قسمت کا فیصلہ کرے گا۔
واضح رہے کہ پاکستان چیمپیئنز ٹرافی کا افتتاحی میچ نیوزی لینڈ سے ہار گیا تھا، جس کے بعد آج بھارت سے بھی شکست کا سامنا کرنا پڑا ہے۔
یہ بھی واضح رہے کہ اس سے قبل 2017 میں پاکستان نے چیمپیئنز ٹرافی جیتی تھی، جب ٹیم کی قیادت سرفراز احمد کے پاس تھی۔ اس وقت پاکستان دفاعی چیمپیئن ہے۔