ایئر پورٹ پر کوکین کے ساتھ پکڑی گئی خاتون نے ایسی بات کہہ دی کہ حکام بھی حیران پریشان رہ گئے

لندن (قدرت روزنامہ) برطانیہ کے جزیرے جرسی میں ایما لیویلین نامی 39 سالہ خاتون کو اس وقت گرفتار کر لیا گیا جب وہ اپنے جسم پر بندھی کوکین کی بھاری مقدار کے ساتھ ایئرپورٹ پر اتریں۔ خاتون کے قبضے سے تقریباً 13 ہزار پاؤنڈ (تقریباً 46 لاکھ روپے) مالیت کی 52 گرام کوکین برآمد ہوئی، لیکن جب پولیس نے اس سے سوال کیا تو خاتون نے حیران کن طور پر کہا “یہ تو بس تھوڑی سی کوکین ہے۔”
ڈیلی سٹار کے مطابق ایما لیویلین لیورپول کے جان لینن ایئرپورٹ سے جرسی پہنچی تھیں جہاں امیگریشن اور کسٹمز حکام نے ان کے سامان کا معائنہ کیا۔ جب ان کے بیگ پر کیے گئے ٹیسٹ میں کوکین کے اثرات پائے گئے تو انہوں نے دعویٰ کیا کہ وہ صرف ایک دوست سے ملنے آئی ہیں۔ ابتدائی طور پر انہوں نے منشیات استعمال کرنے سے انکار کیا لیکن بعد میں تسلیم کیا کہ انہوں نے اپنی آمد سے ایک ہفتہ قبل کوکین لی تھی۔
جب خاتون کی مکمل تلاشی لی گئی تو ان کے جسم سے لپٹی ہوئی 52 گرام کوکین برآمد ہوئی۔ جب پولیس نے ان سے اس بارے میں پوچھا تو انہوں نے بے پرواہی سے جواب دیا “یہ تو بس تھوڑی سی کوکین ہے۔” بعد ازاں تفتیش کے دوران انہوں نے تسلیم کیا کہ وہ منشیات سمگل کرنے کی کوشش کر رہی تھیں اور اس کے بدلے انہیں ایک ہزار پاؤنڈ (تقریباً ساڑھے تین لاکھ روپے) کی رقم ملنی تھی۔
لیویلین نے پولیس کو بتایا کہ وہ ایک شخص کی مقروض تھیں جسے وہ “پورن سٹار” کے نام سے جانتی تھیں۔ ان کے مطابق یہ شخص ایشیائی تھا، اس کی عمر تقریباً 50 سال تھی، وہ کافی موٹا تھا اور بہت رنگین طرزِ زندگی گزار رہا تھا۔ اسی شخص نے انہیں یہ منشیات دی تھیں اور بتایا تھا کہ جرسی پہنچنے کے بعد مزید ہدایات دی جائیں گی۔ اس جرم کے اعتراف کے بعد ملزمہ کو چار سال اور چھ ماہ قید کی سزا سنائی گئی۔