ہونہار پاکستانی طالبہ نے اسٹیمکو سائنس مقابلے میں ملک کا سر فخر سے بلند کردیا

اسلام آباد (قدرت روزنامہ)اسٹیمکو سائنس مقابلوں میں پاکستانی طالبہ نے شاندار کارکردگی کا مظاہرہ کرتے ہوئے گولڈ میڈل اپنے نام کرلیا ہے۔
پاکستانی طالبہ انارہ بہرام درانی نے سنگاپور میں منعقدہ اسٹیمکو سائنس گلوبل مقابلوں میں گولڈ میڈل جیت کر پاکستان کو عالمی سطح پر نمایاں کیا ہے۔
پاکستان بھر سے 15 پاکستانی طلبہ فائنل تک پہنچے، جہاں انہوں نے 13 ممالک کے 177 شرکاء سے مقابلہ کیا۔
اس سے قبل پاکستان بھر سے 26 ہزار طلبہ نے مقابلےمیں حصہ لیا جن میں سے 15 پاکستانی طلبہ بین الاقوامی مقابلے کے لئے جگہ بنا سکے۔
سنگا پورمیں ہونے والے اسٹیمکو سائنس گلوبل مقابلوں کے پہلے مرحلے میں انارہ بہرام درانی نے گولڈ میڈل جیت کر پاکستان کا نام روشن کیا۔
واضح رہے کہ یہ مقابلہ 12 سے 17 فروری 2025 تک نیشنل یونیورسٹی آف سنگا پور میں منعقد ہوا، مقابلے میں دنیا بھر کے نوجوان سائنسدانوں نے اپنی مہارت کا مظاہرہ کیا۔
ایونٹ نوجوان ذہنوں کو سائنس اور جدت طرازی میں بہتری کی طرف راغب کرنے کا اہم پلیٹ فارم ہے، طلبہ نے پاکستان میں انٹرنیشنل کینگرو سائنس مقابلے میں بھی غیر معمولی کارکردگی کا مظاہرہ کیا تھا۔ سائنس میں پاکستانی لڑکیوں کی بڑھتی ہوئی نمائندگی انتہائی اہم ہے۔