بلوچستان حکومت ایوی ایشن ونگ کو عوامی فلاح کے لیے جدید تقاضوں کے مطابق فعال کرے گی، میر سرفراز بگٹی

کوئٹہ(قدرت روزنامہ)وزیر اعلیٰ بلوچستان میر سرفراز بگٹی کی زیر صدارت بدھ کے روز چیف منسٹر سیکرٹریٹ میں بلوچستان ایوی ایشن ونگ کا جائزہ اجلاس منعقد ہوا۔ اجلاس میں ایوی ایشن ونگ کی تنظیم نو، فعالیت اور عوامی فلاحی استعمال کے امور پر تفصیلی غور کیا گیا۔ اس موقع پر ڈائریکٹر جنرل ایوی ایشن ونگ بلوچستان کیپٹن علی آزاد نے تفصیلی بریفنگ دی۔
اجلاس میں چیف سیکرٹری بلوچستان شکیل قادر خان، پرنسپل سیکرٹری بابر خان، سیکرٹری خزانہ عمران زرکون اور دیگر متعلقہ حکام بھی شریک تھے۔
وزیر اعلیٰ بلوچستان میر سرفراز بگٹی نے اجلاس میں کہا کہ بلوچستان حکومت ایوی ایشن ونگ کو جدید تقاضوں کے مطابق فعال بنانے کے لیے تمام وسائل بروئے کار لائے گی۔ اس ونگ کو نہ صرف وی آئی پی موومنٹ کے لیے استعمال کیا جائے گا، بلکہ ہنگامی صورتحال، ریسکیو اور ایمرجنسی سروسز میں بھی اس کا کردار بڑھایا جائے گا۔
انہوں نے کہا کہ ینگ پائلٹس ٹریننگ پروگرام کے ذریعے بلوچستان کے نوجوانوں کو بین الاقوامی معیار کی تربیت فراہم کی جائے گی، تاکہ انہیں بہترین کیریئر کے مواقع فراہم کیے جا سکیں، جو صوبے میں ترقی اور خوشحالی کے دروازے کھولے گا۔
وزیر اعلیٰ کا کہنا تھا کہ حکومت نے جدید ایوی ایشن سہولیات کو عوامی فلاح کے لیے استعمال کرنے کا فیصلہ کیا ہے تاکہ کسی بھی ہنگامی صورت حال میں فوری ردعمل دیا جا سکے۔
انہوں نے کہا کہ بلوچستان ایوی ایشن ونگ کے تحت ینگ پائلٹس ٹریننگ پروگرام صوبے میں ہوا بازی کے شعبے کو فروغ دینے کے لیے اہمیت کا حامل ہے۔ اس پروگرام کے ذریعے نوجوانوں کو جدید تربیت فراہم کر کے مقامی سطح پر ہوا بازی کے ماہرین تیار کیے جائیں گے، جو مستقبل میں بلوچستان اور پورے پاکستان کے لیے فائدہ مند ثابت ہوں گے۔
وزیر اعلیٰ نے مزید کہا کہ ایوی ایشن ونگ کے تحت نوجوان پائلٹس کو پیشہ ورانہ تربیت دے کر ملازمت کے نئے مواقع پیدا کیے جائیں گے، جس سے بلوچستان کے نوجوانوں کو عالمی معیار کی ہوا بازی کی مہارت حاصل کرنے اور ایوی ایشن کے شعبے میں آگے بڑھنے کے مواقع میسر آئیں گے۔
انہوں نے اس بات پر زور دیا کہ ایوی ایشن ونگ کے بنیادی ڈھانچے کو مستحکم کرنے کے لیے عملی اقدامات کیے جائیں اور ایک جامع روڑ میپ تیار کیا جائے۔ وزیر اعلیٰ نے ہدایت کی کہ پائلٹس کی تربیت کے لیے ایک منظم طریقہ کار اپنایا جائے تاکہ نوجوانوں کو عالمی معیار کی ٹریننگ دی جا سکے۔
اجلاس میں اس عزم کا اظہار کیا گیا کہ ایوی ایشن ونگ کو جدید خطوط پر استوار کر کے اسے نہ صرف بلوچستان بلکہ پورے پاکستان کے لیے ایک ماڈل ایوی ایشن ونگ کے طور پر تیار کیا جائے گا، جو وی آئی پی موومنٹ، ہنگامی صورتحال، ریسکیو سروسز اور عوامی فلاح کے دیگر منصوبوں میں بھرپور کردار ادا کرے گا۔