شعور آچکا، نوجوانوں نے ماردھاڑ ، جلاﺅ گھیراﺅ کی سیاست مسترد کردی: عظمیٰ بخاری

لاہور ( قدرت روزنامہ ) صوبائی وزیر اطلاعات عظمیٰ بخاری نے کہا ہے کہ اب شعور آچکا ہے، نوجوان نسل نے ماردھاڑ اور جلاﺅ گھیراﺅ کی سیاست کو مسترد کردیا ہے۔
تفصیلات کے مطابق وزیر اطلاعات پنجاب عظمیٰ بخاری نے مریم نواز کی ایک سالہ کارکردگی کو پاکستان کی تاریخ میں ایک انقلابی باب قرار دیتے ہوئے کہا ہے کہ مریم نواز نے ایک سال میں کامیابیوں کے کئی ریکارڈ قائم کئے ہیں۔ پاکستان کی 76 سالہ تاریخ میں کسی نے اتنے منصوبے نہیں شروع کیے جتنے مریم نواز نے ایک سال میں مکمل کردیئے ہیں۔ مریم نواز عوامی خدمت میں ریکارڈ بنا رہی ہیں جبکہ مخالفین زبان درازی میں جھنڈے گاڑھ رہے ہیں۔ انہوں نے کہا کہ مریم نواز نے سیاست کو خدمت میں تبدیل کرکے نیا ٹرینڈ متعارف کروایا ہے۔پاکستان کے نوجوانوں کو الیکٹرک بائیکس ، سکالرشپ، لیپ ٹاپس اور آسان کاروبار کےلیے قرض چاہیے۔نوجوانوں کو پیٹرول بم،غلیلیں اور کیلوں والے ڈنڈے نہیں چاہیے۔نوجوان نسل کو شعور آچکا ہے، اس نے جلاﺅ گھیراﺅ، تشدد،تخریب کاری اور مار دھاڑ کی سیاست کو یکسر مسترد کردیا ہے۔مریم نواز نوجوان نسل کےلئے ایک امید اور ایک آس بن کر آئی ہیں۔ عظمٰی بخاری نے کہا کہ وزیر اعلٰی پنجاب ایک ماں کی طرح عوام کی دیکھ بھال کر رہی ہے اور ایک ماں ہمیشہ اپنے بچوں کو آگے بڑھتا اور ترقی کرتا ہوا دیکھنا چاہتی۔کوئی ماں اپنے بچوں کو حوالات اور جیلوں میں نہیں دیکھنا چاہتی۔ انہوں نے کہا کہ مریم نواز کی قیادت میں پنجاب حکومت کا عزم ہے کہ ترقی کے اس سفر کو مزید تیز تر کیا جائے، تاکہ ہر شہری کو معیاری زندگی، تعلیم اور روز گار کے مساوی مواقع میسر آ سکیں۔