اپوزیشن اتحاد ایجنڈا سامنے لائے، حکومت بات چیت کے لیے تیار ہے، رانا ثنااللہ کی پیشکش

اسلام آباد (قدرت روزنامہ)وزیراعظم کے مشیر برائے سیاسی امور رانا ثنااللہ نے کہا ہے کہ اپوزیشن اتحاد اپنا ایجنڈا سامنے لائے، حکومت بات چیت کے لیے تیار ہے۔
نجی ٹی وی سے گفتگو کرتے ہوئے انہوں نے کہاکہ حکومت نے اپوزیشن کو اسلام آباد میں کانفرنس کرنے سے نہیں روکا، حزب اختلاف کے رہنما اس معاملے پر سچ بولیں۔
رانا ثنااللہ نے کہاکہ محمود اچکزئی اور شاہد خاقان عباسی کے اپوزیشن اتحاد میں ہونے سے حکمت پیدا ہوگی، کیوں کہ جب معاملہ فہم لوگ آگے آئیں گے تو بات چیت کی راہ ہموار ہوگی۔
ایک سوال کے جواب میں انہوں نے کہاکہ بات چیت ہی تمام مسائل کا حل ہے لیکن 25 اور 26 نومبر کی رات کو کون مذاکرات کی راہ میں رکاوٹ بنا ہمیں سب معلوم ہے۔
واضح رہے کہ اپوزیشن اتحاد کی جانب سے اسلام آباد میں منعقد کی گئی قومی کانفرنس کا آج پہلا روز تھا جس میں سیاستدانوں، وکلا، صحافیوں سمیت اہم شخصیات نے شرکت کی اور ملک کے مسائل پر کھل کر اظہار کیا۔
اسلام آباد میں اپوزیشن اتحاد کی دو روزہ کانفرنس کا کل آخری روز ہے تاہم اپوزیشن اتحاد نے الزام عائد کیا ہے کہ حکومت کی جانب سے کانفرنس کی راہ میں روڑے اٹکائے جارہے ہیں۔
آج کانفرنس کے پہلے روز کے اختتام پر شاہد خاقان عباسی، عمر ایوب اور دیگر نے میڈیا سے گفتگو کرتے ہوئے کہاکہ حکومت آئین کے نام سے گھبراتی ہے، ہم کل ہر صورت کانفرنس میں شرکت کے لیے آئیں گے۔