’کروڑوں روپے سے یہ ناقص کرسیاں خریدی ہیں؟‘، قذافی اسٹیڈیم کی ٹوٹی کرسیوں پر صارفین کی تنقید

اسلام آباد (قدرت روزنامہ)انگلینڈ اور افغانستان کے میچ کے بعد سوشل میڈیا پر چند تصاویر گردش کر رہی ہیں جس میں قذافی اسٹیڈیم کی وی وی آئی پی گیلری میں لگائی جانے والی کرسیاں ٹوٹی ہوئی ہیں۔
تصاویر سوشل میڈیا پر وائرل ہوئیں تو صارفین کی جانب سے اس پر مختلف تبصرے کیے گئے، کسی نے کرسیوں کی ناقص کوالٹی پر تنقید کی تو کوئی اس کا قصواروار عوام کو ٹھہراتا نظر آیا۔
ایک صارف نے لکھا کہ چیئرمین پی سی بی نے کہا تھا کہ یہ کرسیاں 20 سال چلیں گی لیکن انہوں نے چائنا کا لوکل مال لگا دیا ہے۔
سہیل عمران لکھتے ہیں کہ چیمپیئنز ٹرافی کے لیے چیئرمین محسن نقوی کی کوششوں سے قذافی اسٹیڈیم کو اربوں روپے کی مالیت سے آپ گریڈ کیا گیا لیکن افسوس کا مقام ہے کہ پڑھے لکھے کرکٹ فینز ہزاروں روپے مالیت کی ٹکٹ لے کر بھی جہالت کا مظاہرہ کرتے ہیں اور اپنے اسٹرکچر کی حفاظت کرنا نہیں جانتے۔
انہوں نے لکھا کہ یہ وی وی آئی کی نشست ہے جہاں پڑھے لکھے فینز نشست پر بار بار پاؤں رکھ کر کراس کرتے رہے اور پھر یہ ٹوٹ گئی۔
زبیر یوسف لکھتے ہیں کہ قذافی اسٹیڈیم میں لگائی جانے والی کرسیوں کی کوالٹی اچھی نہیں ہے۔
ارشد چوہدری نے لکھا کہ کروڑوں روپے سے ناقص کرسیاں بنوائی گئیں جو پہلے ہی میچ میں ٹوٹ گئی ہیں۔
قادر خواجہ نے لکھا کہ چیئرمین صاحب نے لوگوں کے لیے خوبصورت اسٹیڈیم تیار کروایا لیکن لوگ پڑھے لکھے ہونے کے باوجود جاہل ہیں
واضح رہے قذافی اسٹیڈیم لاہور میں تمام انکلوژرز میں 35 ہزار سفید اور سبز نئی کرسیاں شائقین کرکٹ کے لیے نصب کی گئی تھیں اور چیئرمین پاکستان کرکٹ بورڈ (پی سی بی) باکس سمیت وی آئی پیز باکسز بھی تیارکیے گئے تھے۔