کے پی حکومت کا 365 دنوں میں 625 منصوبے شروع کرنا مذاق کے سوا کچھ نہیں ہے: عظمٰی بخاری

لاہور (قدرت روزنامہ) وزیراطلاعات پنجاب عظمیٰ بخاری نے کہا ہے کہ کے پی حکومت کا 365 دنوں میں 625 منصوبے شروع کرنا مذاق کے سوا کچھ نہیں ہے۔ایک سال میں 365دن ہوتے ہیں، کے پی حکومت نے 625 منصوبے ایک سال میں کیسے شروع کردیئے؟جس صوبے کے پاس یونیورسٹیوں کو چلانے کا بجٹ نہیں اور انکو یونیورسٹیوں کی زمینیں بیچنی پڑیں وہ 625 منصوبے شروع کرنے کا جھوٹ مت بولے۔ گنڈاپور سرکار کے 625 منصوبے بھی ایک ارب درختوں کی طرح ہونگے۔ خیبرپختونخوا ترقی میں نہیں بلکہ لاقانونیت، دہشتگردی اور کرپشن میں سبقت لے رہا ہے۔ ان خیالات کا اظہار انہوں نے بیرسٹر سیف کے بیان پر ردعمل دیتے ہوئے کیا۔
وزیر اطلاعات پنجاب عظمیٰ بخاری نے کہا کہ ہم نے پورے سال میں ایک بھی دن کے پی حکومت کے کسی وزیر یا وزیراعلیٰ کو نئے منصوبے کا افتتاح کرتے نہیں دیکھا۔ ایک سال میں 685 دفعہ تو وزیر اعلٰی دفتر تک نہیں آیا،یہ منصوبے موکلات نے شروع کروادئیے؟خیبرپختونخواہ میں سرکاری ملازمین تنخواہوں کےلیے اور بلدیاتی نمائندے فنڈز کےلئے ہر ہفتے احتجاج کرتے ہیں۔علی امین گنڈاپور کی ترجیحات میں صوبے کے غریب عوام نہیں اڈیالہ کا قیدی ہے۔خیبرپختونخوا میں کرپشن اپنے عروج پر ہے،احتساب کمیٹی کے لوگ خود اس میں ملوث ہیں۔گھڑیاں،انگوٹھیاں اور 190ملین کے ڈاکے مارنے والے کی احتساب کمیٹی خود قابل احتساب ہے۔

عظمٰی بخاری نے مزید کہا کہ خیبرپختونخوا کو وفاق سے ملنے والے فنڈز صرف جلسے،دھرنے اور بندربانٹ کی نذرہورہے ہیں۔وفاقی حکومت کو خیبرپختونخوا کو دیئے فنڈز کا آڈٹ کروانا چاہیے۔