’ سوشل میڈیا پر مہم چلاؤ اور ٹیم میں آجاؤ‘، پاکستانی ٹیم میں تبدیلیوں پر صارفین کے تبصرے

اسلام آباد (قدرت روزنامہ)دورہ نیوزی لینڈ کے لیے پاکستان کرکٹ ٹیم میں کا اعلان کردیا گیا جس میں بڑے پیمانے پر تبدیلی ہوئی۔ محمد رضوان کو ٹی20 ٹیم کی قیادت سے فارغ کرکے سلمان علی آغا کو نیا کپتان مقرر کردیا گیا، جبکہ شاداب خان نائب کپتان ہوں گے۔
ون ڈے ٹیم میں بھی 6 تبدیلیاں کی گئی ہیں، شاہین شاہ آفریدی، محمد حسنین اور عثمان خان کو ون ڈے اسکواڈ سے ڈراپ کردیا گیا۔
سوشل میڈیا صارفین ان تبدیلیوں پر مختلف تبصرے کرتے نظر آتے ہیں۔ سلیم خالق لکھتے ہیں کہ ان تبدیلیوں کے بعد بھی سلیکشن کمیٹی برقرار، عبوری ہیڈ کوچ عاقب جاوید برقرار، ناکام کھلاڑی برقراراور سفارشی کھلاڑی بھی برقرارہیں۔ انہوں نے کہا کہ دورہ نیوزی لینڈ کے اسکواڈ سے اندازہ لگا لیں کہ پاکستان میں شائقین کرکٹ، سابق کرکٹرز اور میڈیا جو کہے اس کی کوئی اہمیت نہیں ہوتی۔
محمد ولید خان لکھتے ہیں کہ ایک روزہ کرکٹ میں بُری پرفارمنس کے بعد پاکستان کی ٹی20 ٹیم اور کپتان تبدیل کردیا گیا، پھر کہتے ہیں کہ ہماری کرکٹ ترقی کیوں نہیں کرتی۔
عامر سعید عباسی لکھتے ہیں کہ سلیکشن کمیٹی اور ہیڈ کوچ برقرارہیں اور ٹیم بھی تقریباً وہی ہے، صرف 19، 20 کا فرق ہے، اب کی بار بھی قوم جیت کی امید کے بجائے اگلی سرجری کے اعلان کا انتظار کرے۔
قادر خواجہ نے لکھا کہ سعود شکیل کو اسکواڈ سے کیوں نکالا گیا یہ بہت بُرا فیصلہ ہے۔
شانزے نامی صارف نے لکھا کہ سوشل میڈیا پر مہم چلاؤ اور ٹیم میں آجاؤ۔
واضح رہے کہ قومی ٹیم نیوزی لینڈ میں 16 مارچ سے 5 اپریل تک 5 ٹی20 اور 3 ون ڈے میچ کھیلے گی۔ سیریز میں پہلا ٹی20 میچ 16 مارچ، دوسرا 18، تیسرا 21، چوتھا 23 اور پانچواں 26 مارچ کو کھیلا جائے گا۔ پاکستان اور نیوزی لینڈ کے درمیان 3 ایک روزہ میچز کا پہلا مقابلہ 29 مارچ، دوسرا 2 اپریل اور تیسرا میچ 5 اپریل کو ہوگا۔