خیبر پختونخوا میں بھی سولر اسکیم کا اجرا، کتنے ہزار گھرانوں کو مفت سولر ملیں گے؟

پشاور(قدرت روزنامہ)خیبر پختونخوا حکومت کے فلیگ شپ منصوبے سولرائزیشن آف ہاؤسز کے باضابطہ اجرا کے ضمن میں منعقدہ تقریب سے خطاب میں وزیر اعلیٰ علی امین کا کہنا تھا کہ ملک میں بجلی کے بحران اور طویل لوڈشیڈنگ سے نمٹنے کے لیے خیبر پختونخوا حکومت نے سولرائزیشن اسکیم کا اجرا کیا ہے۔
ان کے مطابق سولرائزیشن منصوبے کے پہلے مرحلے کی پہلی کیٹگری کے تحت 32500 گھروں کو بالکل مفت سولر یونٹس فراہم کیے جائیں گے، ان سولر یونٹس میں سولر پلیٹس کے علاوہ، بیٹری، پنکھے، لائٹس سمیت دیگر ضروری اشیا شامل ہیں۔
سولر سسٹم کے حصول کی لیے 25 لاکھ 38 ہزار سے زائد آن لائن درخواستیں موصول ہوئیں، جن میں سے 32500 گھرانوں کا انتخاب ای بیلٹنگ کے ذریعے کیا گیا، سولرائزیشن منصوبے کے تحت کل ایک لاکھ 30 ہزار گھرانوں کو سولر سسٹم فراہم کیا جارہا ہے، جن میں 30 ہزار ضم اضلاع کے گھرانے شامل ہیں۔
تقریب سے خطاب کرتے ہوئے وزیراعلیٰ علی امین خان گنڈاپور کا کہنا تھا کہ صوبائی حکومت بانی چیئرمین عمران خان کے وژن کے مطابق لوگوں کو ریلیف اور سہولیات فراہم کرنے کے لیے اقدامات کر رہی ہے، ایک فلاحی ریاست کا فرض بنتا ہے کہ وہ اپنے مستحق لوگوں کو زندگی کی بنیادی سہولیات مفت فراہم کرے۔
وزیراعلیٰ خیبر پختونخوا کا کہنا تھا کہ اس اسکیم کے تحت 65 ہزار مستحق گھرانوں کو بالکل مفت سولر سسٹم فراہم کر رہے ہیں، جبکہ 65 ہزار گھرانوں کو آدھی قیمت پر سولر سسٹم فراہم کر رہے ہیں، مستحق گھرانوں کو سولر سسٹم کی فراہمی کے لئے الیکٹرانک بیلٹنگ کا ایک شفاف طریقہ کار وضع کیا گیا تھا۔
’اسکیم کے تحت بیوہ خواتین، خواجہ سراؤں اور دیگر کمزور طبقوں کو ترجیحی بنیادوں پر سولر سسٹم فراہم کئے جائیں گے، اسکیم میں صوبے کے تمام اضلاع کو ان کی آبادی کی بنیاد پر حصہ دیا گیا ہے، سولر یونٹس کی فراہمی کے سلسلے میں مستحق گھرانوں کے انتخاب کو سیاسی اور انسانی عمل دخل سے دور رکھا گیا ہے۔‘
65 ہزار گھرانوں کو بالکل مفت جبکہ 65 ہزار گھرانوں کو آدھی قیمت اور آسان اقساط پر سولر یونٹس فراہم کئے جائیں گے، منصوبے پر دو مرحلوں میں عمل درآمد کیا جارہا ہے ، 65 ہزار گھرانوں کو پہلے مرحلے جبکہ باقی 65 ہزار گھرانوں کو دوسرے مرحلے میں سولر یونٹس فراہم کیے جائیں گے۔
خیبرپختونخوا حکومت کے سولرائزیشن آف ہاؤسز منصوبے کی مجموعی تخمینہ لاگت 20 ارب روپے لگایا گیا ہے، وزیر اعلیٰ علی امین گنڈاپور کا کہناتھا کہ اس منصوبے میں تعاون کرنے پر وہ منتخب عوامی نمائندوں کے مشکور ہیں، ہمارا مقصد شفافیت اور میرٹ کو یقینی بنانا اور حق کو حقدار تک پہنچانا ہے۔
علی امین گنڈاپور کے مطابق اس اسکیم کے ذریعے نہ صرف لوگوں کو بجلی کی بلا تعطل فراہمی یقینی ہوگی بلکہ نیشنل گرڈ پر بجلی کے بوجھ کو کم کرنے میں بھی مدد ملے گی، سولر یونٹس کے لئے 25 لاکھ لوگوں کا درخواستیں دینا ہمارے سسٹم پر عوامی اعتماد کا مظہر ہے۔
خیبر پختونخوا حکومت کے فلیگ شپ منصوبے سولرائزیشن آف ہاؤسز کے باضابطہ اجرا کے ضمن میں وزیر اعلیٰ ہاؤس میں منعقدہ تقریب میں وزیر اعلیٰ خیبر پختونخوا علی امین خان گنڈاپور سمیت صوبائی کابینہ اراکین، اراکین صوبائی اسمبلی، سرکاری حکام اور میڈیا نمائندگان بھی شرکت کی۔