خواتین معاشرے میں اپنا بھرپور کردار ادا کر رہی ہیں، سینیٹر ثمینہ ممتاز زہری
کوئٹہ(قدرت روزنامہ)خواتین کسی بھی معاشرے کا اہم ستون ہیں جنہیں کسی صورت نظر انداز نہیں کیا جاسکتا، معاشرے کی ترقی میں خواتین کا اہم کردار ہے اور کوئی بھی معاشرہ خواتین کی شرکت کے بغیرترقی نہیں کر سکتا۔خواتین کو جو حقوق دین اسلام نے دیئے ہیں مغرب میں ان کا تصور بھی نہیں کیا جاسکتا۔ان خیالات کا اظہارسینٹ کی اسٹینڈنگ کمیٹی برائے انسانی حقوق کی چیئرپرسن سینیٹر ثمینہ ممتاز زہری نے خواتین کے عالمی دن کے موقع پر منعقدہ ایک تقریب سے خطاب کرتے ہوئے کیا۔انہوں نے کہا کہ پاکستانی خواتین باشعور، باہمت اور تعلیم یافتہ ہیں اورمعاشرے کے ہر طبقے میں اپنا کردار ادا کر رہی ہیں۔اس موقع پر انہوں نے کہا کہ خواتین معاشرے کا اہم حصہ اور بلوچستان میں خواتین کے حقوق کے لئے بھرپور کام کیا جارہا ہے۔پاکستان کی نصف آبادی یعنی خواتین کی فلاح و بہبود اور ترقی کے لئے مواقع فراہم کرنا ناگزیر ہے۔چین کے تعاون سے خواتین کی صحت کے حوالے سے شروع کئے گئے شی پروگرام کے تحت بلوچستان میں اہم پیش رفت ہوئی ہے اور اس میں مزید کام کر رہے ہیں۔انہوں نے کہا کہ معاشرے میں خواتین کو مختلف مسائل کا سامنا ہے جس کے سدباب کے لئے ہر سطح پر ہمیں جامعہ پالیسی بنانی ہو گی اور ان پر عملدرآمد کے لئے اقدامات کرنے ہوں گے۔آئین پاکستان میں خواتین کے حقوق کے تحفظ کی ضمانت دی گئی ہے۔آج خواتین کا عالمی دن منانے کا مقصد خواتین کے حقوق اور ان کے تحفظ بارے آگاہی پیدا کرنا ہے۔انہوں نے تقریب سے خطاب کرتے ہوئے کہا کہ خواتین کی مضبوطی کے بغیر کسی بھی معاشرے کی مضبوطی ممکن نہیں ہے۔سینیٹر ثمینہ ممتاز زہری نے فلسطین اور کشمیر کی آزادی کے لئے جدوجہد کرنے والی اُمت مسلمہ کی بیٹیوں کو سلام پیش کرتے ہوئے کہا کہ ہمیں آج کے دن فلسطین اور کشمیر میں جدوجہد کرنے والی بہادر بیٹیوں کو نہیں بھولنا چاہئے جو اپنی آزادی اور حقوق کے لئے جدوجہد کر رہی ہیں۔انہوں نے کہا کہ ہنر مند اور خود مختار خواتین معاشرے میں اہم کردار ادا کر سکتی ہیں اوراس کی تعمیر و ترقی میں خواتین کے مثبت اور تعمیری کردار سے انکار نہیں کیا جاسکتا۔ہم نے سینٹ کے پلیٹ فارم سے ملک بھر کی خواتین بالخصوص بلوچستان میں بسنے والی خواتین کے جائز حقوق اور ان کے تحفظ سمیت روزگار اور دیگر امور کے لئے بھرپور نمائندگی کی ہے اور ان اقدامات پر عملدرآمد کے لئے ہماری جدوجہد جاری رہے گی۔انہوں نے کہا کہ خواتین کو بااختیار بنانے اور تحفظ کے لئے اقدامات کئے جارہے ہیں۔چیئرپرسن انسانی حقوق سینیٹر ثمینہ ممتاز زہری نے مزید کہا کہ پاکستان ایک اسلامی ملک ہے اور خواتین کی عزت و احترام ہماری سماجی، معاشرتی و مذہبی اقدار کا حصہ ہے اوریہاں خواتین کو اسلامی اقدار میں رہتے ہوئے اپنے جائز حقوق کے لئے آواز بلند کرنے کی اجازت ہے لیکن اس کی آڑمیں ناجائز فائدہ اٹھانے اور غلط پروپیگنڈہ کرنے کی ہرگز اجازت نہیں دی جائے گی۔انہوں نے امید ظاہر کی کہ پاکستانی خواتین بالخصوص بلوچستان کی پڑھی لکھی اور ہنرمند مائیں بہنیں اور بیٹیاں اپنے اور دوسری خواتین کے جائز حقوق اور تحفظ کے لئے بغیر کسی ڈر اور خوف کے اپنا کردار ادا کریں گی۔
